सरकार निजी क्षेत्र मिलेर सिपमूलक तालिम सञ्चालन गर्ने

काठमाडौं ।
श्रम, रोजगार तथा सामाजिक सुरक्षा मन्त्री गौरीशंकर चौधरीले सरकार निजी क्षेत्र मिलेर सिपमुलक तालीम सञ्चालन गर्ने बताएका छन् । नेपाल उद्योग वाणिज्य महासंघको स्वास्थ्य तथा सीप विकास समितिका प्रतिनिधिसंगको भेटमा उनले नीजि क्षेत्रको सुझाव अनुसार सीपमुलक तालिम सञ्चालन गर्ने सरकारको योजना रहेको बताए । महासंघवाट प्राप्त सुझाव एवं प्रस्तावलाई ध्यानमा राखी आगामी दिनमा सीपमुलक तालिम सन्चालन गर्ने उनले प्रतिवद्धता समेत जनाए ।

नेपाल उद्योग वाणिज्य महासंघको स्वास्थ्य तथा सीप विकास समितिका सभापति हेमराज ढकाल, सहसभापति भक्त बहादुर हमाल,सदस्य सीताराम रेग्मी, महासंघका पूर्वकारिणी समिति सदस्य कमला श्रेष्ठ सहितको प्रतिनिधिमण्डलले श्रममन्त्री चौधरीलाई भेटी सरकार र नीजि क्षेत्रको सहकार्यमा सीपमुलक तालिम सञ्चालन गर्नुपर्नेमा जोड दिएको थियो । महासंघका तर्फबाट सीपमुलक तालिमको लागि थुप्रै संस्थाहरूले तालिम दिने र ठुलो रकम खर्च हुने गरेपनि नीजि क्षेत्रको माग अनुसार दक्ष एवं सीपयूक्त जनशक्ति पाउन कठिनाई भईरहेको उनीहरुको भनाई थियो ।

भेटमा सभापति ढकालले एकातिर मुलुकभित्र सञ्चालित उद्योगधन्दाका लागि चाहिएको जनशक्ति नपाउंदा ठूलो समस्या भएको र अर्कोतिर विनाकुनै शीप कामका लागि विदेशीने यूवाहरू न्यूनतम पारिश्रमिकमा अधिकतम समय काम गर्न बाध्य भएकाले यो समस्याको अन्त्य गर्न पनि शीपयुक्त जनशक्ति विकासका लागि तत्काल तालीम सञ्चालन गर्नुपर्नेमा जोड दिएका हुन् ।