तीन सय युवाहरूले उधमशीलताका लागि विनाब्याज तीन लाख रुपैयाँ प्राप्त गर्ने

भक्तपुर ।
तीन सय युवाहरूले उधमशीलताका लागि विनाब्याज तीन लाख रुपैयाँ प्राप्त गर्ने भएका छन् । चाँगुनारायण नगरपालिकाका तीन सय जना युवाहरूलाई नेपाल बैंकले व्यावसायिक प्रस्तावको आधारमा पालिकाको जमानीमा तीन लाख रूपैयाँको दरले विनाब्याज लोन दिने भएको हो ।

राष्ट्रिय युवा परिषद्, चाँगुनारायण नगरपालिका र नेपाल बैंक लिमिटेडको आयोजना मंगलबारदेखि सुरु भएको ‘सहुलियतपूर्ण कर्जा सहजीकरणका लागि उद्यमशीलता तथा वित्तीय साक्षरता–जीवाईवी/एसवाईवी’ सात दिवसीय तालिम कार्यक्रममा बैंकले उक्त जानकारी दिएको हो । सोमबारसम्म सञ्चालन हुने तालिममा तीन सय ७० जना सहभागी छन् । उनीहरूलाई १० समूहमा विभाजन गरेर तालिम दिइएको छ । तालिमका उद्घाटन कार्यक्रममा राष्ट्रिय युवा परिषद्का कार्यकारी उपाध्यक्ष माधव ढुंगेलले प्रभावकारी सहुलियतपूर्ण कर्जा कार्यान्वनका लागि परिषद्ले युवा र बैंकलाई जोड्ने बताए ।

साथै बैंकले युवाको प्रस्तावनाको आधारमा कर्जा प्रवाह गर्नुपर्ने बताए । कार्यक्रममा नेपाल बैंकका डेपुटी सीईओ प्रकाश अधिकारीले आवश्यक डकुमेन्टसहित प्रक्रियामा आए बैंकले प्रस्तावना हेरेर लगानी गर्ने बताए । युवाहरूले उधमशीलताका लागि विनाब्याज तीन लाख रुपैयाँ प्राप्त गर्नेछन् । मेयर उधमशीलता कार्यक्रम चलाउने चाँगुनारायण नगरपालिका देशकै पहिलो नगरपालिका हो ।