Techie IT
×
गृहपृष्ठसमाचारसिंगापुरबाट आएको १३ टन कोभिड–१९ सम्बन्धी स्वास्थ्य सामग्री सरकारलाई हस्तान्तरण

सिंगापुरबाट आएको १३ टन कोभिड–१९ सम्बन्धी स्वास्थ्य सामग्री सरकारलाई हस्तान्तरण


काठमाडौं ।
देशमा फैलिएको कोभिड–१९ महामारीसँग लड्नका लागि सिंगापुरबाट आएको १३ टनभन्दा बढी स्वास्थ्य सामग्री सरकारलाई हस्तान्तरण गरिएको छ । उक्त मेडिकल कार्गो लिएर नेपाल वायुसेवाको चार्टर उडान शनिबार सिंगापुरबाट काठमाडौँ आइपुगेको थियो । तामासेक फाउन्डेसन सिंगापुर, लोटस लाइफ फाउन्डेसन सिंगापुर, गोर्खा ब्रुअरी प्रालिका साथै नेपाल सरकार, विभिन्न मन्त्रालयहरू, कूटनीतिक नियोगहरू र नेपाली प्रवासीसँग घनिष्ठ सहकार्यद्वारा गरिएको सहयोगबाट यो सम्भव भएको हो । करिब तीन मिलियन सिंगापुर डलर (करिब २५ करोड नेपाली रूपैयाँ)को संयुक्त अनुमानित मूल्यको कार्गो स्वास्थ्य तथा जनसंख्या मन्त्रालयलाई आइतबार हस्तान्तरण गरिएको छ ।

स्वास्थ्य तथा जनसंख्या मन्त्री हृदयेश त्रिपाठीलाई दुई दाताहरूका तर्फबाट गोर्खा ब्रुअरीका उपप्रबन्ध निर्देशक सुरेन्द्र सिलवालले एक संक्षिप्त समारोहमा हस्तान्तरण गरेका हुन् । यसमा एक लाख २३ हजारभन्दा बढी फोर्टिट्यूड ३.० पीसीआर परीक्षणहरू सिंगापुरको विज्ञान, प्रविधि र अनुसन्धान एजेन्सीद्वारा डिजाइन गरिएको छ, (ए स्टार), पाँच हजार बाकस सिटोटेस्ट स्वाब कीट (२ लाख ५० हजार कीट), २ मेगेक ३२ आएनए निकासी मेसिनहरू, दुई हजार पाँच सय निकासी कीट र रिजेन्ट्स, ३० अल्फा टेली–भेन्टिलेटर, ६ फिलिप्स ट्रिलोजी इभो भेन्टिलेटर, ५० युवेल वि–पाप, नन्–इन्भेसिभ भेन्टिलेटरहरू र चार हजार पल्स अक्सीमीटरहरू समावेश छन् । यसका साथै थप मेडिकल आपूर्तिको दोस्रो कार्गो आगामी केही हप्तामा सिंगापुरबाट नेपाल आउने बताइएको छ ।

तामासेक फाउन्डेसन इन्टरनेसनलका मुख्य कार्यकारी अधिकारी, बेनेडिक्ट चिओङले एक वक्तव्यमा भनेका छन्, ‘कोभिड–१९ को विभिन्न भेरिएन्टहरूबाट भर्खरै देखिएका अवस्थाहरूबाट यो कुरा प्रस्ट भएको छ कि हामीले जीवन बचाउन र महामारीलाई नियन्त्रणमा ल्याउन निरन्तर सँगै मिलेर काम गरिरहनु आवश्यक छ । तामासेक फाउन्डेसन महामारीको विरूद्ध विश्वव्यापी युद्ध लड्न नेपालका हाम्रा मित्र र छिमेकीहरूसँग एकसाथ रहेको छ ।’

सिंगापुरस्थित तामासेक फाउन्डेसनले २०७७ मा स्वास्थ्य तथा जनसंख्या मन्त्रालयलाई फोर्टिट्यूड २.० पीसीआर कोभिड–१९ जाँच्ने टेस्ट कीट र अक्सिजन कन्सन्ट्रेटर प्रदान गरेको थियो । यसैगरी २०७२ को भूकम्पपछि मन्त्रालयलाई शिक्षा र तालिम कार्यक्रमहरूमा सहयोग गरेको थियो ।

मन्त्री त्रिपाठीले अहिलेको कठिन घडीमा सिंगापुरको तामासेक फाउन्डेसन, लोटस लाइफ फाउन्डेसन तथा गोर्खा बु्रअरीबाट प्राप्त यो सहयोग प्राथमिकताको आधारमा विभिन्न अस्पतालहरूलाई वितरण गरिने बताए । कोभिड–१९ को महामारी अझै बढ्दै गएको यस स्थितिमा गोर्खा बु्रअरीबाट आउँदो दिनहरूमा पनि यस्तै सहयोगको आशा गरिएको उनले बताए ।

उक्त सामानहरू हस्तान्तरण गर्ने क्रममा गोर्खा बु्रअरीका उपप्रबन्ध निर्देशक सुरेन्द्र सिलवालले यस्तो महामारीको अवस्थामा कोभिड–१९ नियन्त्रण तथा उपचारको लागि तत्काल प्रयोगमा आउने सामग्रीहरू सरकारलाई सहयोग गर्न पाउँदा खुशी लागेको बताए । सरकारबाट उक्त सामग्रीहरू प्राथमिकताको आधारमा विभिन्न अस्पतालहरूलाई अविलम्ब वितरण गरी कोभिड उपचारमा सकारात्मक योगदान गर्ने विश्वास पनि व्यक्त गरे ।

गोर्खा बु्रअरीले यसअघि पनि विभिन्न विषम परिस्थितिमा नेपाल सरकार तथा अन्य विभिन्न क्षेत्रहरूमा निरन्तररूपमा विभिन्न सहयोग गर्दै आएको छ । २०७२ को भूकम्पमा पनि यस कम्पनीबाट नेपाल सरकारलाई १० करोड नेपाली रूपैयाँ सहयोग स्वरूप प्रदान गरिएको थियो । लोटस लाइफ फाउन्डेसन सिंगापुरले तामासेक फाउन्डेसन र नेपाल सरकारलाई यस महत्वपूर्ण मानवीय अभियानमा सहकार्य गरेकोमा धन्यवादज्ञापन गर्नुका साथै यस उपकरणले फ्रन्टलाइन स्वास्थ्यसेवाकर्मीहरूलाई महामारीलाई नियन्त्रण गर्न मदत पु-याउँछ भन्ने आशा गरेका छन् ।


क्याटेगोरी : समाचार

तपाईको प्रतिक्रिया