खानेपानीमा ४३ अर्ब ५४ करोबड बजेट

काठमाडौँ ।सरकारले खानेपानी तथा सरसफाइमा आगामी आर्थिक वर्ष २०७८÷०७९ का लागि ४३ अर्ब ५४ करोड विनियोजन गरेको छ । अर्थमन्त्री विष्णु प्रसाद पौडेलले प्रस्तुत गरेको बजेट वक्तव्यमा सबै नागरिकमा खानेपानीको पहुँच विस्तार गर्दै गुणस्तरीय खानेपानी उपलब्ध गराइने उल्लेख छ ।

अहिले ९१ दशमलव पाँच प्रतिशत जनसंख्यामा आधारभूत खानेपानीको पहुँच पुगेको छ । यस्तै, एक घर एक धाराको अवधारणा कार्यान्वयन गरिने, खानेपानीको दीगो व्यवस्थापनका लागि उपभोक्ता समितिको क्षमता विस्तार गरिने बजेटमा उल्लेख छ । चालू आवमा मेलम्ची खोलाको पानी वितरण सुरु भएकामा सरकारले आगामी आवमा सोही आयोजनाअन्तर्गत यांग्री र लार्के खोलाबाट काठमाडौँ उपत्यकामा पानी ल्याउन आवश्यक पूर्वाधार निर्माण अघि बढाउने योजना बनाएको छ ।

हाल मेलम्चीबाट दैनिक १७ करोड लिटर पानी आउने गरेकामा दैनिक थप ३४ करोड लिटर पानी आउने गरी सो निर्माण अघि बढाउन लागिएको हो । आगामी आवमा सो आयोजनाका लागि तीन अर्ब ५१ करोड विनियोजन गरिएको छ । सरकारले आगामी आवमा काठमाडौँ उपत्यकाको खानेपानी वितरणमा उल्लेख्य सुधार गर्ने योजना बनाएको छ । पहिलो चरणमा चार थोक प्रणालीबाट ११३ किमि नयाँ वितरणलाइन थप गरी एक लाख १० हजार घरधूरीमा पानी वितरण गरिनेछ । यस्तै दोस्रो चरणको पानी वितरणका लागि कीर्तिपुर, पेप्सीकोला, भक्तपुरलगायतका स्थानमा संरचना निर्माण अघि बढाइनेछ । सो कामका लागि सरकारले चार अर्ब ७९ करोड विनियोजन गरिएको छ ।

निर्माणाधीन नदी पथान्तरण आयोजनाबाट तराई–मधेश र भित्री मधेशका ठूला सहरहरुमा खानेपानी आपूर्ति गर्ने गरी आयोजना विकास गरिने र ग्रामीण क्षेत्र लक्षित खानेपानी आयोजना निर्माण सुरु गर्दा लागतको एक प्रतिशत रकम उपभोक्ताले जम्मा गर्नुपर्ने व्यवस्था खारेज गरेको छ । उपभोक्ता समूहद्वारा सञ्चालित खानेपानी आयोजनामा विद्युत महसुल तथा डिमाण्ड शुल्क पूरै छुटको व्यवस्था गरेको छ । त्यस्तै, सरकारले आगामी आबमा बिभिन्न स्थानमा लिफ्ट खानेपानी आयोजना सम्पन्न गर्न तीन अर्ब ६६ करोड विनियोजन गरेको छ । सहलगानीमा निर्माणाधीन आयोजना सम्पन्न गर्न दुई अर्ब ६८ करोड छुट्याइएको छ । संघ, प्रदेश र स्थानीय तहद्वारा सञ्चालित आयोजना प्रणाली नियमित मर्मतका लागि तीन अर्ब २९ करोड विनियोजन छ । काठमाडौँ उपत्यकामा र उपत्यकाबाहिरका सहरमा ढल प्रशोधन केन्द्र निर्माण अघि बढाउन पनि बजेट वक्तव्यमा उल्लेख छ ।

क्याटेगोरी : समाचार