निगमका महाप्रबन्धक पौडेलविरुद्ध अख्तियारमा डलर अपचलनको उजुरी

काठमाडौं । नेपाल वायुसेवा निगमलाई विगत तीन महिनादेखि खल्तीमा हालेर सिंहदरकारतिर डुल्दै हिँडेका महाप्रबन्धक डिमप्रसाद पौडेल र कानुनी सल्लाहकार आभास पण्डितविरुद्ध वैदेशिक मुद्रा अपचलन गरेको आरोप लगाएर कारबाहीको माग गर्दै अख्तियार दुरुपयोग अनुसन्धान आयोगमा उजुरी परेको छ ।

नेपाल वायुसेवा निगममा क्रियाशील रहेका तीनवटै कर्मचारी युनियनका अध्यक्ष र महासचिवहरुले संयुक्त रुपमा उक्त उजुरी गरेका हुन् । नेपाल वायुसेवा निगम कर्मचारी युनियन, नेपाल राष्ट्रिय कर्मचारी संगठन नेवानि र नेपाल वायुसेवा निगम कर्मचारी संघका अध्यक्ष र महासचिवहरुले संयुक्त रुपमा गत ५ गते अख्तियार दुरुपयोग अनुसन्धान आयोगमा उजुरी गरेका हुन् ।

उजुरीमा गत ६ जुन २०२१ मा बोइङ ७५७, ९एनएसीए जहाज र आइबेरियाको बोइङ ७५७ को इन्जिन बेच्ने र लिलाम गर्ने अमेरिका जाने भनी नेपाल वायुसेवा निगमका महाप्रबन्धक डिमप्रसाद पौडेल र निगमका कानुनी सललहकार आभास पण्डितले विदेशी मुद्राको सुविधा लिएको तर अचानक उक्त भ्रमण रद्द भएपछि पनि उनीहरुले सो रकम फिर्ता नगरेकाले वैदेशिक मुद्रा अपचलन गरेको अभियोगमा कारबाही गर्न माग गरिएको हो ।

त्यतिबेला निगमका महाप्रबन्धक पौडेल आईडी नं. २००२५ केले सात हजार अमेरिकी डलर र निगमका कानुनी सल्लाहकार आभास पण्डितले चार हजार एक सय ५० अमेरिकी डलर अग्रिम लिएका थिए । निगमको अर्थ विभागबाट उनीहरुले उक्त रकम बुझिलिएका थिए तर संस्कृति पर्यटन तथा नागरिक उड्डयन मन्त्रालयले उनीहरु गन्तव्यतर्फ उड्नुअघि नै उनीहरुको भ्रमण रद्द गरेकाले उनीहरुको अमेरिका भ्रमण रोकिएको थियो ।

त्यसरी तालिम, सेमिनार वा गोष्ठीमा भाग लिन जाने कर्मचारीले अग्रिम लिएको पेस्की रकम त्यहाँबाट फर्किएर कार्यालयमा हाजिर भएको मितिले १५ दिनभित्र र त्यस्तो प्रयोजनको लागि पेस्की लिएको रकम त्यस्तो प्रयोजनमा खर्च नहुने भएमा पेस्की लिएको सात दिनभित्र फिर्ता बुझाउनुपर्ने कानुनी व्यवस्था छ तर उनीहरु जाने भनिएको कार्यक्रम पर्यटन मन्त्रालयले हस्तक्षेप गरी रद्द गरेपछि उनीहरुले उक्त रकम ११ हजार एक सय ५० अमेरिकी डलर सात दिनभित्रै फिर्ता गर्नुपर्ने भए पनि उनीहरुले अहिलेसम्म उक्त रकम फिर्ता बुझाएका छैनन् ।

निगम नै बेचेर भए पनि पैसा कमाउन हिँडेका महाप्रबन्धक पौडेल र उनका कानुनी सल्लाहकार पण्डितले हात परेको एक हजार एक सय ५० अमेरिकी डलर फिर्ता नै नगरेकाले निगमका तीनवटै कर्मचारी युनियनका नेताहरुले कारबाहीका लागि आयोगमा उजुरी गरेका हुन् ।