रक्सोल–काठमाडौं रेलवे समझदारीपत्रमा हस्ताक्षर

काठमाडौँ । नेपाल र भारतबीच रक्सोल–काठमाडौं रेलवे परियोजनाको ‘फाइनाल लोकेसन सर्भे’सम्बन्धी द्विपक्षीय समझदारीपत्रमा बिहीबार सम्झौता भएको छ ।बिहीबार यससम्बन्धी समझदारीपत्रमा हस्ताक्षर भएको नेपालस्थित भारतीय दूतावासले ट्विटरमार्फत जानकारी दिएको हो । दुई देशबीच क्रसबोर्डर (अन्तर्देशीय) ब्रोडगेज रेलवे लाइन निर्माणको लागि यो सम्झौता भएको हो ।

योसँगै अब भारतीय पक्षले प्रस्तावित रक्सोल–काठमाडौं रेलवेको विस्तृत परियोजना प्रतिवेदन (डीपीआर)को थालनी गर्नेछ । हालसम्म यसको वातावरण तयार गर्न भारतीय पक्षले ताकेता गरिरहेको थियो । गत फागुन २५ मा बसेको मन्त्रिपरिषद्को बैठकले नेपालको रेल विभागका निर्देशकलाई समझदारी पत्र स्वीकृत गरी हस्ताक्षर गर्न अख्तियारी प्रदान गरेको थियो ।

यसले बिहीबारको समझदारी पत्रमा हस्ताक्षर गर्ने बाटो खुल्ला भएको थियो । भारतले काठमाडौंसम्म ब्रोडगेज रेलवे सम्भव भएकोले यसैलाई जोड दिँदै आएको थियो । सोहीअनुसार नेपाल सहमत भएपछि समझदारीपत्रमा हस्ताक्षर भएको हो । नेपाली पक्षले भने स्ट्यान्डर्ड गेजमा जोड दिए पनि भारतको विज्ञता ब्रोडगेजमा भएकोले यहीअनुसार सहमति भएको हो ।

यता चीनले पनि काठमाडौंसम्म रेलवे निर्माणमा सहयोग गर्ने बताउँदै आएको छ । चीनले भने स्ट्यान्डर्ड गेजको रेलमार्ग निर्माणमा जोड दिएको छ । तर भारतसँग भने ब्रोडगेज रेलवे निर्माण हुने देखिएको छ । पछिल्लो समय नेपालमा रेलवे निर्माणलाई जोड दिइँदै आएको छ । अहिले धमाधम पूर्व–पश्चिम रेलमार्ग निर्माणलाई सरकारले जोड दिएको छ । यी सबैका बीच नेपालले आफैँ किनेको रेल भने एक वर्षयता यतिकै थन्किएर बसेको छ ।

२०७७ असोजमा भारतबाट दुईवटा रेल ल्याए पनि अझै कानुनी अभावमा सञ्चालन हुन सकेको छैन । ती दुवै रेल त्रिपालले छोपेर राखिएको छ । रेलवे विभागमा सत्ता परिवर्तन भएपिच्छे नेतृत्व परिवर्तन हुँदा आएका रेल पनि सञ्चालन हुन नसकेका हुन् । नेपालले भारतीय कम्पनी कोंकण रेलवे कर्पोरेसनबाट ८४ करोड ६५ लाख रुपैयाँमा ती दुई रेल किनेको थियो । दुवै रेल राष्ट्रिय ध्वजाअंकित छन् । रेल सञ्चालनको लागि संरचना समेत तयारी अवस्थामा रहे पनि जनशक्ति नहुँदा सरकार नै अलमलिनुपरिरहेको छ ।

क्याटेगोरी : समाचार