बैंकिङ कसुर मुद्दामा फरार व्यक्ति पक्राउ

काठमाडौं । बैंकिङ कसुर मुद्दाका फरार प्रतिवादी पक्राउ परेका छन् । केन्द्रीय अनुसन्धान ब्युरो (सीआईबी) का अनुसार गोकर्णेश्वर नगरपालिका ३ बस्ने दोलखा भीमेश्वर नगरपालिका ३ घर भएका ४३ वर्षीय जितेन्द्र बहादुर रिजाललाई बिहीबार पक्राउ गरिएको हो ।

उच्च अदालत पाटनको २०७६ पुस ७ गतेको फैसलाले बैंकिङ कसुर मुद्दामा दुई दिन कैद र नगद १२ लाख रुपैयाँ जरिवाना ठहर गरी भई फरार रहेका उनलाई प्रहरी प्रधान कार्यालय केन्द्रीय अनुसन्धान ब्युरो महाराजगञ्जबाट खटिएको प्रहरीले काठमाडौं सुन्ताखानबाट पक्राउ गरेको सीआईबीले जनाएको छ ।

रिजालले आफ्नो बैंक खातामा पर्याप्त मौज्दात रकम नभएको भन्ने जानी–जानी पीडितलाई झुक्यानमा पारी एनआईसी एसिया बैंकको खाताबाट भुक्तान हुने भनी चेक काटी दिएकोमा बैंकिङ कसुरजन्य अपराध गरेको ठहर गरी अदालतले उक्त फैसला गरेको हो । उनलाई फैसला कार्यान्वयनका लागि जिल्ला अदालत काठमाडौंमा पेश गरिएको सीआईबीले जानकारी दिएको छ ।