Techie IT
आजको आर्थिक दैनिक

Aarthik Dainik

An Economic Newsportal

गृहपृष्ठसमाचारकृषि क्षेत्रमा लगानी बढाउन आग्रह

कृषि क्षेत्रमा लगानी बढाउन आग्रह


काठमाडौं । अर्थमन्त्री जनार्दन शर्माले कृषि क्षेत्रमा लगानी बढाउन राष्ट्रिय वाणिज्य बैंकलाई आग्रह गरेका छन् । बैंकको ५७औं वार्षिकोत्सवलाई सोमबार भर्चुअल माध्यमबाट सम्बोधन गर्दै उनले कृषि क्षेत्रमा कम्तिमा दुई गुणा लगानी बढाउन आग्रह गरेका हुन् ।

बैंकले अब बन्ने नयाँ कार्यक्रममा आफ्नो ११ प्रतिशत कृषि क्षेत्रको लगानी, पाँच प्रतिशत पर्यटन र पाँच प्रतिशत औद्योगिक क्षेत्रको लगानीलाई वृद्धि गर्नुपर्ने उनले बताए । यसलाई सकेसम्म दुई गुणा वृद्धि गर्नुपर्ने र यसबाट राष्ट्रिय पुँजी निर्माण, उत्पादन तथा रोजगारीमा महत्वपूर्ण योगदान पुग्ने उनको भनाइ छ । सरकारको नीति पनि उत्पादनमुखी क्षेत्रको लगानीमा केन्द्रित रहेको स्मरण गराउँदै उनले उत्पादनमुखी क्षेत्रमा लगानी बढाउन आग्रह गरे ।

मन्त्री शर्माले आत्मनिर्भर हुनका लागि लगानी अति आवश्यक रहेको बताउँदै बैंकले वैदेशिक ऋण भित्र्याउन गरिरहेको प्रयासमा सरकारले सहयोग गर्ने विश्वास समेत दिलाए । उनले राष्ट्रिय वाणिज्य बैंक सरकारी वित्तीय संस्था भएकाले यसले मोडेलको भूमिका निर्वाह गर्नुपर्ने बताए । ‘निजी क्षेत्र, सहकारी र सार्वजनिक क्षेत्रको त्रिपक्षीय साझेदारीमा देशको अर्थतन्त्रलाई विकास गर्ने हाम्रो मुख्य रणनीति हो’, उनले भने, ‘यो रणनीतिमा रहेर यस बैंकले वित्तीय क्षेत्रमा एउटा मोडल स्थापित गर्नुपर्छ ।’ उनले बैंकले मोडल स्थापित गरेर अन्य वित्तीय संस्थाहरूलाई पनि शिक्षा दिन सक्नुपर्ने बताए ।

पछिल्लो समय प्रविधिको युग रहेको बताउँदै मन्त्री शर्माले बैंकले सुरु गरेको ‘अनस्ट्रक्चर्ड सप्लिमेन्टरी सर्भिस डाटा’ (यूएसएसडी) प्रशंसनीय रहेको उल्लेख गरे । यसले इन्टरनेट नभएको स्थानमा पनि मोबाइल बैंकिङको लाभ ग्राहकले लिनसक्ने उनको भनाई थियो । त्यस्तै उनले यो प्रविधिबाट वित्तीय साक्षरता तथा वित्तीय पहुँच वृद्धि हुनेमा पनि विश्वास व्यक्त गरे । बैंकको वार्षिकोत्सवका अवसरमा मन्त्री शर्माले यूएसएसडी सेवाको उद्घाटन तथा ‘उपहार’ पुस्तकको लोकार्पण समेत गरेका थिए । बैंक २०२२ माघ १० गते स्थापना भएको थियो । हाल यसले देशभरका दुई सय ५८ शाखाबाट सेवा प्रदान गर्दै आइरहेको छ । 


क्याटेगोरी : समाचार

तपाईको प्रतिक्रिया