सम्पादकलाई धम्कीप्रति पत्रकार महासंघको आपत्ति

काठमाडौं । नेपाल पत्रकार महासंघ काठमाडौं शाखाले शाखा सदस्य तथा केन्द्रीय पार्षद एवं आर्थिक दैनिकका सम्पादक प्रल्हाद रिजालमाथि प्रकाशित समाचारको विषयलाई लिएर आएको भौतिक आक्रमणको धम्कीप्रति ध्यानाकर्षण भएको जनाएको छ ।

महासंघ काठमाडौं शाखाका सचिव महेश्वर गौतमले बुधबार विज्ञप्ति जारी गर्दै समाचारकै निहुँमा भौतिक आक्रमणको धम्की दिइएकोमा आपत्ति जनाएका हुन् । सम्पादक रिजाललाई आर्थिक दैनिकमा प्रकाशित समाचारलाई लिएर सेञ्चुरी बैंकका अध्यक्ष राजेश श्रेष्ठले गत आइतबार ललितपुरको होटल हिमालयमा बोलाएर छुरी हान्ने धम्की दिएका थिए ।

‘प्रकाशित समाचाराको विषयमा चित्त नबुझे त्यसउपर कानुनी उपचार खोज्ने निकाय र प्रशस्त बाटो हुँदाहुँदै पत्रकारलाई धम्क्याउने कार्य प्रेस स्वतन्त्रताविरोधी र ठाडो हस्तक्षेप हो’, काठमाडौं शाखाले जारी गरेको विज्ञप्तिमा भनिएको छ । सो कार्यको शाखाले घोर भर्त्सना गरेको छ । साथै धम्की दिने श्रेष्ठलाई तत्काल कानुनी दायरामा ल्याई प्रेस स्वतन्त्रताको सुरक्षाको ग्यारेन्टी गर्न सम्बद्ध निकायसँग माग समेत गरिएको छ । यसअघि नेपाल पत्रकार महासंघ उपत्यका प्रदेश समितिले पनि सो धम्कीको भर्त्सना गरेको थियो ।