धितोपत्र बोर्डले पायो नेतृत्व, अध्यक्षमा हमाल

काठमाडौं । लामो समय कार्यकारी प्रमुखविहीन भएको नेपाल धितोपत्र बोर्डले अन्ततः नेतृत्व पाएको छ । मन्त्रिपरिषद्को बिहीबार बसेको बैठकले रमेश हमाललाई बोर्डको अध्यक्ष पदमा नियुक्त गरेको हो ।

यसअघि भने बोर्डको अध्यक्ष पदमा नेपाल राष्ट्र बैंककै पूर्वकार्यकारी निर्देशक भीष्मराज ढुंगाना रहेका थिए । सर्वोत्तम सिमेन्टको सेयर खरिद प्रकरणमा ढुंगाना मुछिएसँगै सरकारले उनलाई स्पष्टीकरण सोधेको थियो । सो क्रममा चित्तबुझ्दो जवाफ नआएपछि सरकारको इच्छाअनुसार नै ढुंगानाले पदबाट राजीनामा दिएर नयाँ अध्यक्षको लागि बाटो खुल्ला गरिदिएका थिए । सोपश्चात् पनि निकै लामो समय बोर्ड नेतृत्वविहीनको अवस्थामा थियो ।

तर बिहीबार सरकारले बोर्डको अध्यक्षमा हमाललाई नियुक्त गरेसँगै बोर्र्डले कार्यकारी प्रमुख पाएको छ । बोर्डको अध्यक्षको लागि अर्थ मन्त्रालय मातहत रहने गरी राष्ट्रिय योजना आयोगका उपाध्यक्ष विश्व पौडेल संयोजकत्वको छनोट समिति गठन भएकोमा उक्त समितिले हमालसहित नेपाल राष्ट्र बैंकका पूर्वकार्यकारी निर्देशक डा. गोपाल भट्ट र बोर्डमै कार्यरत कृष्ण पोखरेलको नाम सिफारिस गरेका थिए । सोही आधारमा हमाल बोर्डको अध्यक्षमा नियुक्त भएका हुन् ।

नवनियुक्त अध्यक्ष हमालले इलेक्ट्रिकल इन्जिनियरिङमा स्नातक गरेका छन् भने झण्डै आठ वर्ष नेपाल विद्युत् प्राधिकरणमा काम गरेको अनुभव छ । त्यसपछि पूर्ण छात्रवृत्तिमा अध्ययन गर्न थाइल्याण्डको बैंकक पुगेका हमालले बैंककबाटै इन्टरनेशनल बिजनेस एण्ड फाइनान्समा स्नातकोत्तर गरेका छन् ।

सन् २००७ देखि २०१० सम्म गैरआवासीय नेपाली संघ (एनआरएनए), थाइल्याण्डको अध्यक्ष भएका थिए । उनले थाई–नेपाल चेम्बर अफ कमर्समा पूर्वउपाध्यक्ष समेत भई छ वर्ष काम गरेका थिए । उनीसँग संयुक्त राष्ट्रसंघको वातावरणीय प्रोजेक्ट, ब्रिटिस इन्भेष्टमेन्ट कन्सल्टेन्सी एण्ड रियलस्टेट डेभलपमेन्ट ग्रुप बैंकको चिफ अपरेटिङ अफिसर भएर काम गरेको लगायतका दर्जनौैँ संस्थामा अनुभव छ ।