Techie IT
×
गृहपृष्ठbreakingमिटरब्याजीले पक्राउ गरे ग्रिनलाइनका अमित अग्रवाललाई

मिटरब्याजीले पक्राउ गरे ग्रिनलाइनका अमित अग्रवाललाई


काठमाडौं । मिटरब्याजीलाई पैसा तिर्न नसकेर भागेका ग्रिनलाइन सेन्टर प्रालिका सञ्चालक अमित अग्रवाललाई शुक्रबार प्रहरीले पक्राउ गरेको छ । स्रोतका अनुसार मिटरब्याजीहरूले पैसा नतिरेको भनेर उजुरी गरेपछि प्रहरीले उनलाई पक्राउ गरेको हो ।

राजधानीको दरबारमार्गमा विगत २२ वर्षदेखि ग्रिनलाइन सेन्टरको नाममा विभिन्न देशका महंगा मदिराहरूको व्यापार गर्दै आएका अग्रवाल गत पुस २२ गतेदेखि परिवारसहित सम्पर्कविहीन भएका थिए । अग्रवाल केही दिनअगाडि सार्वजनिक भएका थिए ।

अग्रवाललाई पक्राउपछि टेकु प्रहरीको हिरासतमा राखिएको छ । गत वर्ष आर्मीको भुक्तानीमा कीर्ते गरेको आरोपमा पक्राउ परेका सञ्जय अधिकारी र असिम राणाको उजुरीमा अग्रवाललाई पक्राउ गरिएको हो ।

अग्रवालले मिटरब्याजमा लिएको करिब ८० लाखभन्दा बढी रुपैयाँ अधिकारी, राणालगायतलाई तिर्न बाँकी छ । योबाहेक अग्रवाललाई मिटरब्याजमा पूर्वप्रहरी अधिकृत दिपक रञ्जित, सुनिल श्रेष्ठलगायतले २५ करोड दिएका थिए ।

अग्रवालले मिटरब्याजमा लिएको २५ करोडमा अहिलेको सरकारी बहालवाला उच्च प्रहरी अधिकारीहरूको समेत पैसा लगानी भएका कारण उनलाई पक्राउ गर्न दबाब पर्दै आएको स्रोतको दाबी छ ।

अधिकारी र राणाको उजुरीमा अग्रवाल पक्राउ परेपछि सुनिल श्रेष्ठ, दिपक रञ्जितलगायतका व्यक्तिहरू पनि मौका छोपेर अग्रवालको सम्पत्ति कब्जा गर्न दौडिरहेका छन् । कुनै समय अग्रवालका नजिकका साथीहरूमध्ये यिनीहरू नै थिए । उनीसँग भौतिक सम्पत्ति प्रशस्त रहेको कारण त्यही सम्पत्ति कब्जा गर्न उनीहरूले मौकाको फाइदा उठाउन लागेको स्रोतको दाबी छ ।

ठूलो मात्रामा मिटरब्याज र बैंकको पैसा लिएर सपरिवार सम्पर्कविहीन भएपछि बैंकहरूले गरेको लगानीको विषयमा राष्ट्र बैंकले समेत फाइल मगाएर अध्ययन गरेको थियो । नेपालबाट अर्बौँ रुपैयाँ पैसा उठाएर अग्रवाल सपरिवार भागेको समाचारहरू आएपछि अग्रवाल परिवार सम्पर्कमा आएको थियो ।

बैंकको ब्याज र अरु व्यक्तिहरूलाई ब्याज तिर्न समस्या भएको मिटरब्याजीहरूले विभिन्न फन्दामा पारी आफ्नो सम्पत्ति सिध्याउन खोजेको लगायतका आरोपपत्र घरमा छोडेर भागेको अग्रवाल परिवारले भारत पुगेलगत्तै कोभिड भएर सम्पर्कमा आउन नसकेको बताएको थियो ।

समाचार स्रोतका अनुसार पछिल्लो समय अग्रवाल हुण्डीको ठूलो कारोबार समेत गर्दै आएका थिए । उनले खासगरी नेपालमा काम गरेर भारत पैसा पठाउनेहरूसँग पैसा जम्मा गरी नेपालमा लिने र भारतमा उनीहरूले चाहेको व्यक्तिलाई भुक्तानी दिने गर्दथे ।


क्याटेगोरी : breaking, समाचार

तपाईको प्रतिक्रिया