Techie IT
×
गृहपृष्ठसमाचारबचतकर्ताहरूको छ करोड ठगी गर्ने सहकारीका सञ्चालक पक्राउ

बचतकर्ताहरूको छ करोड ठगी गर्ने सहकारीका सञ्चालक पक्राउ


काठमाडौं । बचतकर्ताहरूको छ करोड २५ लाख रुपैयाँ ठगी गर्ने सहकारीका दुई जना सञ्चालन पक्राउ परेका छन् । केन्द्र्रीय अनुसन्धान ब्युरो (सीआईबी)ले काठमाडौँको पुरानो बानेश्वरमा रहेको भरोसा नेपाल बहुउद्देश्यीय सहकारी संस्थाका सञ्चालक समितिका अध्यक्ष र उपाध्यक्षलाई पक्राउ गरेको हो ।

पक्राउ पर्नेहरूमा काठमाडौँ महानगरपालिका वडा नं ३० का ४२ वर्षीय सुरज बस्नेत र काठमाडौँको पकानाजोलका ५७ वर्षीय शिवनाथ पाण्डे रहेका छन् । उनीहरूलाई गत फागुन ४ गते काठमाडौँबाट पक्राउ गरिएको सीआईबीका प्रवक्ता एवं सूचना अधिकृत प्रहरी उपरीक्षक श्यामकुमार महतोले जानकारी दिए । अध्यक्ष बस्नेतलाई काठमाडौँको अनामनगरबाट र पाण्डेलाई पकनाजोलबाट पक्राउ गरिएको उनको भनाइ छ ।

सहकारी संस्थाका निक्षेपकर्ता सदस्यहरूले उक्त संस्थामा बचत तथा आवधिक खाता खोली जम्मा गरेको रकम सञ्चालकहरूले हिनामिना गरी आफूखुसी सहकारी संस्थाको खातामा नराखी आफ्नै परिवारका सदस्य र आफन्तहरूको नाउँमा राखेका थिए । उनीहरूले १५ जना निक्षेपकर्ताहरूको छ करोड २५ लाख रुपैयाँ रकम दुरुपयोग गरेको र भुक्तानी फिर्ता माग्दा समेत नदिई सहकारी संस्थामा ताला लगाई लगाएर हिँडेका थिए । संस्थामा ताला लगाएर सहकारी सञ्चालक फरार भएपछि बचतकर्ताले प्रहरीमा उजुरी दिएका थिए । साथै अन्य बचतकर्ताहरूले उक्त सहकारीबाट निक्षेप तथा ब्याज रकम नपाई कानुनी कारबाही गर्नुपर्ने भएमा सीआईबीमा सम्पर्क राख्न पनि प्रवक्ता महतोले आग्रह गरेका छन् ।

बैंकिङ कसुर मुद्धाका फरार अभियुक्त पक्राउ
बैकिङ कसूर मुद्दाका फरार प्रतिवादी पक्राउ परेका छन । केन्द्रिय अनुसन्धान व्युरो (सिआईबी) का अनुसार तारकेश्वर नगरपालिका–१० मनमैजुमा श्रृष्टी प्रफुल सप्लायर्स संचालन गरी बस्ने नुवाकोट शिवपुरी गाउँपालिका–८ घर भएका ४३ वर्षीय राम प्रसाद पाण्डेलाई सोमबार पक्राउ गरिएको हो ।

Open photo

बैंकिङ कसूर मुद्दामा उच्च अदालत पाटनको गत माघ २ गतेको फैसलाले पाँच दिन कैद र २२ लाख रुपैयाँ जरिवाना ठहर भई फरार रहेका उनलाई सिआईबीको टोलिले नेपालटार काठमाडौंबाट पक्राउ गरेको हो । पाण्डेले एनआइसी बैंक लिमिटेडमा रहेको उनको खातामा पर्याप्त मौज्दात रकम नभएको भन्ने जानी–जानी पीडितलाई झुक्यानमा पारी चेक दिएको र रकम भुक्तान हुन नसकेको ठहर गर्दे अदालतले उनी विरुद्ध २२ लाख रुपैयाँ जरिवाना तिर्न फैसला गरेको थियो । उनलाई फैसला कार्यान्वयनको लागि मंगलबार जिल्ला अदालत ललितपुरमा पेश गरिएको सिआईबीले जानकारी दिएको छ ।


क्याटेगोरी : समाचार

तपाईको प्रतिक्रिया