Techie IT
×
गृहपृष्ठbreakingउद्योग प्रवेश गराउन गाह्रो भएको सेजमा उद्योग स्थापनाका लागि प्रस्ताव आह्वान

उद्योग प्रवेश गराउन गाह्रो भएको सेजमा उद्योग स्थापनाका लागि प्रस्ताव आह्वान


काठमाडौं । सम्भाव्यता अध्ययन भएको २० वर्ष भइसक्दा पनि विशेष आर्थिक क्षेत्र प्राधिकरण (सेज) को विकास हुनसकेको छैन । सन् २००० मा सम्भाव्यता अध्ययन तथा सन् २००४ मा भने सिमरा, पाँचखाल र नुवाकोटमा प्राधिकरण स्थापना गर्ने निर्णय गरेको नेपाल सरकारले २००८/००९ को बजेटमार्फत धनुषा, धनगढी र जुम्लामा प्राधिकरण स्थापना घोषणा गरेको थियो ।

त्यसपछि मुलुकका विभिन्न १४ स्थानमा प्राधिकरण स्थापना गर्ने घोषणा गरेको थियो । तर, हालसम्म एउटा सेजले पनि पूर्णता प्राप्त गर्नसकेको छैन । एकातर्फ सेजले पूर्णता प्राप्त गर्न नसक्नु अर्कोतर्फ उद्योगहरु प्रवेश गर्न अरुचि देखाउनुको बाबजुद पनि प्राधिकरणले उद्योग स्थापनाका लागि भैरहवा सेज र सिमरा सेजमा प्रस्ताव पेश गर्न आग्रह गरेको छ । विशेष गरी सेजमा पूर्वाधारको विकास नहुँदै उद्योगीहरुलाई प्रस्ताव पेश गर्न आग्रह गर्नु निर्यात मापदण्ड र कर्मचारीतन्त्रको कार्यशैलीका कारण उद्योगीहरु आउन चाहेका छैनन् । सेजमा उत्पादन भएका वस्तुहरुमध्ये ६० प्रतिशत उत्पादन निर्यात गर्नुपर्ने बाध्यकारी व्यवस्था छ भने यसअघि ७५ प्रतिशत रहेको थियो ।

यसैबीच कैयौँ वर्ष ट्रान्सफर्मर उपलब्ध नहुँदा अलपत्र परेको भैरहवा सेजमा ५० वटाभन्दा बढी प्लट प्रदान गर्न सकिने प्राधिकरणले जनाएको छ । त्यसमध्ये हालसम्म बढीमा पाँच वटा प्लटहरु मात्र प्रयोगमा आएका थिए । उक्त अवस्था पनि अहिले छैन । शक्ति मिनरल्सले भैरहवा सेजमा आफ्नो उत्पादन गरी निर्यात गरेकोमा उक्त उद्योग समेत बाहिरिने तयारीमा छ ।

सिमरा सेज अर्थात् सिमरा गार्मेन्ट प्रशोधन क्षेत्रमा समेत उद्योगीहरु आउन इच्छुक देखिएका छैनन् । ६८ वटा प्लटहरु रहेको सिमरा सेजमा गार्मेन्ट प्रशोधन उद्योगलाई प्रमुख प्राथमिकतामा राखे पनि ती उद्योगहरुले रुचि देखाएका छैनन् । अमेरिकाले १० वर्षसम्म नेपाली गार्मेन्टलाई शून्य भन्सार गरेको कारण सेजमा गार्मेन्ट उत्पादनलाई प्राथमिकतामा राखे पनि उद्योग आउनसकेका छैनन् । गार्मेन्ट उद्योग आउन नसकेपछि अन्य उद्योगलाई खुला गरेको सिमरा सेज पनि प्रभावकारी बन्नसकेको छैन । भैरहवा र सिमरा सेजको विकासमा सरकारले चासो नदिएको भन्दै स्वयं प्राधिकरणका कर्मचारीहरु सेज खारेज गरिदिए हुने प्रतिक्रिया दिँदै आएका थिए । भैरहवा, सिमरापछि पाँचखाल सेजमा रुख कटान तथा भवन निर्माणको प्रक्रिया अघि बढाउने भने पनि त्यसो हुनसकेको छैन ।

यसैबीच प्राधिकरणले गत साता भैरहवा तथा सिमरा सेजभित्र उद्योग स्थापना तथा सञ्चालन गर्न चाहने उद्योगी र लगानीकर्ताहरुलाई विशेष आर्थिक क्षेत्र ऐन, २०७३ (पहिलो संशोधन) को दफा ८ तथा विशेष आर्थिक क्षेत्र नियमावली, २०७४ (पहिलो संशोधन) को नियम २४ अनुसार प्राधिकरणसमक्ष प्रस्ताव पेश गर्न आग्रह गरेको छ ।

उद्योग छनोट ‘उद्योगलाई जग्गा उपलब्ध गराउनेसम्बन्धी मापदण्ड, २०७८’ अनुसार गरिने र उद्योगहरुको क्लस्टेरिङ गरी प्लट उपलब्ध गराउने समेत प्राधिकारणले जनाएको छ । विशेष आर्थिक क्षेत्रले उपलब्ध गराउने भौतिक पूर्वाधारहरुमा भने आन्तरिक सडक, विद्युत्, पानी, ढल, पेट्रोल पम्प, धर्मकाटा, सुरक्षा, दूषित पानी प्रशोधन केन्द्र, बैंक, बीमा आदि रहेका छन् । भैरहवा सेजमा ब्लक ‘ए’ भित्र भित्र ४५ वटा प्लट र सिमरा सेजअन्तर्गत ब्लक ‘ए’ भित्र ६८ वटा प्लटहरु उपलब्ध गराउने भएको छ । भू–बहाल .(भाडा) मासिक २० रुपैयाँ तथा भू–बहाल अवधि बढीमा ३० वर्ष, कानुनमा व्यवस्था भएबमोजिम थप गर्न सकिनेछ । इच्छुकहरुले प्रस्ताव ३० फागुनभित्र दिनुपर्नेछ ।


क्याटेगोरी : breaking, समाचार

तपाईको प्रतिक्रिया