आजबाट बजारमा एक रुपैयाँ दरको नयाँ सिक्का प्रचलनमा

काठमाडौं । नेपाल राष्ट्र बैंकले फागुन २५ गते अर्थात् आज बुधबारबाट एक रुपैयाँ दरको नयाँ सिक्का चलनचल्तीमा ल्याएको छ । राष्ट्र बैंकका अनुसार साबिककै आकार तथा सुनौलो रंगमा टकमरी गरिएको साल २०७७ लेखिएको सिक्का आजबाट चलनचल्तीमा आएको हो ।

यो सिक्काको अग्र भागमा सिक्काको वृत्ताकार घेराभित्र ६४ वटा थोप्लाहरु रहेको, ६४ थोप्लाहरूको वृत्ताकार घेराभित्र हिमाल, पहाड र तराईको पृष्ठभूमिमा सात प्रदेशसहितको नेपालको नक्सा रहेको छ । सिक्काको माथिल्लो भागमा अंग्रेजीमा रि. वन र तल्लो भागमा देवनागरी लिपिमा १ रुपैयाँ लेखिएको छ । नेपालको नक्साको दायाँतर्फ फरक क्षमता भएका (दृष्टिविहीन) हरुले स्पर्श गरेर सिक्काको दर पहिचान गर्नका लागि एउटा मोटो थोप्लो रहेको राष्ट्र बैंकले जानकारी दिएको छ ।

सिक्काको पृष्ठभागमा भने सिक्काको वृत्ताकार घेराभित्र ६४ वटा थोप्लाहरु रहेको, आठ थोप्लासहितको वृत्ताकार चित्रभित्रको वर्गाकार आकृतिलाई वरिपरि चन्द्र, सूर्य, चक्र, शंख, पद्म, गदा तथा बीचमा सगरमाथाको आकृति र सो आकृतिको मुनि अंग्रेजीमा सगरमाथा नेपाल लेखिएको छ । सिक्काको माथिल्लो भागमा देवनागरी लिपिमा नेपाल र तल्लो भागमा २०७७ लेखिएको राष्ट्र बैंकको भनाइ छ ।