पुँजीगत खर्च बढाउन निर्देशन

काठमाडौं । सहरी विकास मन्त्री रामकुमारी झाँक्रीले मन्त्रालयअन्तर्गतका आयोजना प्रमुखहरूलाई पुँजीगत खर्च बढाउन निर्देशन दिएकी छिन् । सोमबार मन्त्रालय सम्बद्ध आयोजना प्रमुखबाट हालसम्मको प्रगति विवरणको जानकारी लिँदै उनले आयोजनाको प्रगति र खर्चबाट सन्तुष्ट हुन सकिने ठाउँ नरहेको बताइन् ।

बारम्बार निर्देशन दिँदा पनि पुँजीगत खर्चमा खासै प्रगति नभएकोमा उनले असन्तुष्टि जनाइन् । ‘हामीले बारम्बार छलफल सल्लाह गर्छौँ तर कामको गति उस्तै छ । हामीसँग समय थोरै छ, देखिने गरी काम गरौँ’, उनले भनिन् । काठमाडौं उपत्यका विकास प्राधिकरण र अधिकार सम्पन्न वाग्मती सभ्यता एकीकृत समितिले जनताले अनुभूत गर्नेगरी काम गर्न नसकेको मन्त्री झाँक्रीको भनाइ छ ।

मन्त्रालयका सचिव डा. रमेशप्रसाद सिंहले आयोजनाहरूको पुँजीगत खर्चको स्थिति सन्तोषजनक नदेखिएकाले सबै आयोजना प्रमुखहरूलाई सक्रियतापूर्वक काम गर्न निर्देशन दिए । मन्त्रालयका सहसचिव प्रकीर्ण तुलाधरका अनुसार चालू आर्थिक वर्षमा चालूतर्फ ५३ दशमलव ३९ प्रतिशत र पुुँजीगततर्फ ३५ दशमलव ३९ प्रतिशत गरी कुल ३६ दशमलव ७३ प्रतिशत खर्च भएको छ । उनले अघिल्लो वर्षको सोही अवधिमा समग्रमा ६२ प्रतिशत खर्च भएको बताउँदै यस वर्ष मन्त्रालयको खर्चको स्थिति सन्तोषजनक नरहेको बताए ।

सहरी विकास तथा भवन निर्माण विभागका महानिर्देशक पद्मकुमार मैनालीले हालसम्म विभागले ४० प्रतिशत प्रगति गरेको विवरण मन्त्री समक्ष पेस गरेका थिए । उनले आगामी असार १५ गतेसम्म विभागले झण्डै ८० प्रतिशत कार्य प्रगति ल्याउने पनि बताए । यस्तै सघन सहरी कार्यक्रमको प्रगति विवरण ४० प्रतिशत रहेको उनको भनाइ थियो ।