झण्डै २ सय प्रतिशतले बढ्यो विदेश जाने युवाको संख्या
काठमाडौं । मुलुकमा पर्याप्त रोजगारी नहुँदा युवा/युवतीहरुको एक मात्र रोजाइ बन्नपुगेको वैदेशिक रोजगारीमा जानेको संख्या अत्यधिक बढेको छ । कोभिड १९ महामारीपछि सामान्य बनेको परिस्थितिसँगै वैदेशिक रोजगारीमा जाने युवाको संख्या करिब दुई सय प्रतिशतले बढेको वैदेशिक रोजगार विभागले बताएको छ ।
गत आर्थिक वर्षको तुलनामा चालू आर्थिक वर्षको १० महिनाको अवधिमा विदेश जाने युवाको संख्यामा एक सय ९१ प्रतिशतले बढेको हो । चालू आर्थिक वर्षको १० महिनामा चार लाख ९७ हजार सात सय जना युवाले वैदेशिक रोजगारीमा जान श्रम स्वीकृति लिएको विभागले जानकारी दिएको छ भने गत आर्थिक वर्षको सोही अवधिमा एक लाख ७१ हजार जना युवाले वैदेशिक रोजगारीमा जान श्रम स्वीकृति लिएका थिए ।
एक सय २० वटा मुलुकभन्दा बढी मुलुकमा रोजगारीको लागि नेपाली युवाहरु जाने गरेकोमा सबैभन्दा बढी भने खाडीका छवटा, मलेसिया, दक्षिण कोरिया, जापान, पोर्चुगललगायतका मुलुकहरुमा जाने गरेको पाइन्छ । सरकारले संस्थागत श्रम स्वीकृतिका लागि भने एक सय आठवटा मुलुकहरु खुला गरेको छ ।
चालू आर्थिक वर्षको १० महिनाको अवधिमा सबैभन्दा बढी श्रम स्वीकृति मंसिरमा र सबैभन्दा कम पहिलो महिना अर्थात् साउनमा श्रम स्वीकृति प्रदान गरिएको छ । साउनमा २५ हजार चार सय, भदौमा ३६ हजार, असोजमा ३९ हजार छ सय, कात्तिकमा ५४ हजार नौ सय, मंसिरमा ७४ हजार तीन सय, पुसमा ६६ हजार छ सय, माघमा ५४ हजार चार सय, फागुनमा ४१ हजार नौ सय, चैतमा ५९ हजार तीन सय र वैशाखमा ४५ हजारलाई श्रम स्वीकृति प्रदान गरिएको छ ।
यसरी श्रम स्वीकृति लिनेमा अधिकांश बेरोजगार युवाहरु रहेको विभागका अधिकारीहरु बताउँछन् । वार्षिक उच्च संख्यामा युवाहरु नेपाली श्रम बजारमा प्रवेश गर्ने गरेका छन् तर रोजगारीसम्बन्धी सरकारको स्पष्ट नीति तथा कार्यान्वयन नहुँदा उनीहरु बाध्यात्मक वैदेशिक रोजगारीमा जाने गरेका छन् ।
आर्थिक सर्वेक्षणअनुरुप पनि नेपाली श्रम बजारमा वार्षिक रुपमा पाँच लाख १२ हजार सक्रिय युवा श्रमशक्तिले प्रवेश गर्ने गरेका छन् । आन्तरिक बजारमा श्रम तथा रोजगारीको माग तथा आपूर्तिमा भएको अन्तरका कारणले गर्दा युवाहरुको लागि वैदेशिक रोजगारी अनिवार्य बन्नपुगेको छ ।
सर्वेक्षणले युवाहरुको वैदेशिक रोजगारीमा आर्कषण बढ्नुमा आन्तरिक श्रम बाजरमा रोजगारीको अवसरको कमी, श्रमको कदर नगर्ने प्रवृत्ति, न्यून पारिश्रमिक, शिक्षा, सूचना र प्रविधिको विकास तथा बढ्दो महत्वाकांक्षा कारक रहेको उल्लेख गरेको छ । पछिल्लो समय भने अन्तर्राष्ट्रिय श्रम बजार खुला गरेसँगै युवाहरुलाई वैदेशिक रोजगारी सहज भएको हो ।
यसैबीच, सरकारले आन्तरिक रोजगारीभन्दा पनि वैदेशिक रोजगारीलाई प्राथमिकतामा राखेको पाइन्छ । जस्तो श्रम स्वीकृतिको सहजता, विमानस्थलको सहजतालगायतका कारक देख्न सकिन्छ ।
भौतिक उपस्थितिविना श्रम स्वीकृति दिने श्रम, रोजगार तथा सामाजिक सुरक्षा मन्त्रालयको नीति तथा भैरहवामा वैदेशिक रोजगार कार्यालय स्थापनाले विदेश जान थप सहजीकरण गरिदिएको छ । त्यस्तै गौतम बुद्ध अन्तर्राष्ट्रिय विमानस्थल सञ्चालनमा ल्याएसँगै विदेश जाने युवाहरुलाई काठमाडौं धाउनुपर्ने बाध्यता तथा पर्खिनुपर्ने बाध्यता समेत हटेको छ ।
वैदेशिक रोजगार कार्यालयले वैशाख २ देखि संस्थागत र माघ २ देखि पुनः श्रम स्वीकृति अनलाइनबाट प्रदान गर्ने गरेको थियो । सोसँगै कार्यालयमा दैनिक हुने हजारौँको भीड हटेको थियो । हाल भौतिक उपस्थितिमा भइरहेको नयाँ व्यक्तिगत श्रम स्वीकृति र वैधानिकीकरणमार्फत हुने श्रम स्वीकृतिको काम पनि अनलाइनबाट मात्र हुने व्यवस्थासँगै कार्यालयले पूर्ण रुपमा अनलाइन प्रणालीबाट मात्र सेवाप्रवाह गर्ने भएको छ ।
क्याटेगोरी : समाचार
ताजा अपडेट
- चार दशमलव ७८ अंकले उक्लियो सेयर बजार
- राष्ट्रियसभाका उपाध्यक्षद्वारा राजीनामा
- पुँजीगत बजेट खर्च नहुने अवस्थाको अन्त्य हुनुपर्छ : प्रधानमन्त्री
- मन्त्री चौधरी र राजदूत हेक्काबीच भेटवार्ता
- चीनको औद्योगिक मुनाफामा उच्च वृद्धि
- हुन्डाइले विद्युतीय गाडी उत्पादनका लागि थप ५० अर्ब लगानी गर्ने
- पेप्सोडेन्ट नेपालको दन्त स्वास्थ्य जागरूकता कार्यक्रम
- माछापुच्छ्रे बैंकले गर्यो शैलेश्वरी विद्यालयमा शौचालय निर्माण
धेरैले पढेको
- समसामयिक राजनीतिक व्यङ्ग्य
- ढोरपाटन जोड्ने सडक कालोपत्रे गरिँदै
- एक्सेल डेभलपमेन्ट बैंकको ट्राफिक प्रहरीलाई सहयोग
- युनिश शाहीको गीत ‘धारिलो तिर˝ को भ्युज वान मिलियन नाघ्यो
- इन्फिनिटी लघुवित्तको सातै प्रदेशमा तालिम सम्पन्न
- चिया पसल पनि कम्पनी ?
- नेकपा माओवादी केन्द्र कंचनपुर-काठमाडौ सम्पर्क समन्वय समितिको पाचौं भेला सम्पन्न
- नेपाली अमेरिका कलाकार सङ्घमा बसन्ती राई
तपाईको प्रतिक्रिया