Techie IT
×
गृहपृष्ठbreakingएनसेलको पक्षमा बहस गर्ने घिमिरे निक्षेप तथा कर्जा सुरक्षणको सीईओमा नियुक्त

एनसेलको पक्षमा बहस गर्ने घिमिरे निक्षेप तथा कर्जा सुरक्षणको सीईओमा नियुक्त


काठमाडौं । एनसेलले नेपाल सरकारलाई तिर्नुपर्ने करको विषयमा विवाद उत्पन्न हुँदा एनसेलले कर तिर्नुपर्दैन भन्दै अदालतमा बहस गरेका रमेश घिमिरेलाई सरकारले निक्षेप तथा कर्जा सुरक्षण कोषको प्रमुख कार्यकारी अधिकृत (सीईओ)मा नियुक्त गरेको छ ।

नेकपा सरकार हुँदा प्रदेश नं. १ का मन्त्री समेत रहेका जीवन घिमिरेको भाइ रहेका नवनियुक्त सीईओ घिमिरेलाई सोमबार बसेको मन्त्रिपरिषद् बैठकले राजस्वसचिव कृष्णहरी पुस्करको संयोजकत्वमा गठित सीईओ छनोट तथा सिफारिस समितिले सिफारिस गरेको कविराज अधिकारी, रमेश दाहाल र घिमिरेबाट नियुक्त गरेको हो ।

सरकारले प्रतिस्पर्धाबाट घिमिरेलाई चार वर्षका लागि नियुक्त गरिएको हो । यसअघिका प्रमुख कार्यकारी अधिकृत विष्णुबाबु मिश्रको कार्यकाल सकिएपछि कोषमा उक्त पद खाली रहेको थियो । उक्त पदमा नियुक्तिका लागि छनोट तथा सिफारिस समितिले दुई पटकसम्म आवेदन आह्वान गरेको थियो ।

दोस्रो पटकमा प्राप्त आवेदनबाट अन्तर्वार्ता तथा कार्यपत्र प्रस्तुतिका लागि पाँच जना कविराज अधिकारी, मेघेन्द्रप्रकाश गिरी, रमेश कुमार पोखरेल, रमेश घिमिरे र रमेश दाहाल छनोट भएर आएका र उनीहरुबाट तीन जना अन्तिम छनोटका लागि सिफारिस भएका थिए । उक्त पदका लागि मान्यताप्राप्त शिक्षण संस्थाबाट अर्थशास्त्र, वाणिज्यशास्त्र, व्यवस्थापन, वाणिज्य कानुन, लेखा, बैंकिङ वा बीमा विषयमा कम्तीमा स्नातकोत्तर उपाधि हासिल गरेको वा चार्टर्ड एकाउन्टेन्ट उपाधि हासिल गरेको हुनुपर्ने प्रावधान छ ।


क्याटेगोरी : breaking, समाचार

तपाईको प्रतिक्रिया