प्रदेश प्रहरीका लागि मधेश सरकारले संघीय सरकारविरुद्ध आन्दोलन गर्ने

जनकपुर । मधेश प्रदेश सरकारले संघीय सरकारको विरुद्ध आन्दोलन गर्ने भएको छ । लामो समयदेखि मधेश सरकारले आफ्नो मातहतमा प्रदेश प्रहरी भर्ना गर्न पाउनुपर्ने माग संघीय सरकारसँग गर्दै आएको छ । उक्त मागको सुनुवाइ नभएको भन्दै मधेश प्रदेश सरकारले संघीय सरकारका विरुद्ध आन्दोलनको तयारी थालेको छ ।

प्रदेश प्रहरी विधेयक प्रदेशसभाबाट पारित भइसके पनि संघीय सरकारको कानुनसँग बाझिने भएकाले मधेश सरकारले आगामी साउन २९ देखि संघीय सरकारविरुद्व आन्दोलन गर्ने भएको छ । बुधबार मधेश सरकारका गृह तथा सञ्चार मन्त्री भरत प्रसाद साहले पत्रकार सम्मेलनको आयोजना गरी साउन २२ गते संघीय सरकारका प्रनितिधि प्रदेश प्रमुखमार्फत सातदिने अल्टिमेटमसहितको ज्ञापनपत्र बुझाउने र माग सम्बोधन नभए आठौँ दिनदेखि सडकआन्दोलन थाल्ने बताए ।

पत्रकार सम्मेलनमा उनले भने, ‘संघीय गृह मन्त्रालयले प्रहरी समायोजनको सम्पूर्ण काम पूरा गरिसकेको र नेपाल सरकारले निर्देशन दिए सात दिनभित्र समायोजन गर्न सकिने बताइसकेको अवस्थामा प्रधानमन्त्री शेर बहादुर देउवाले चुनावअघि समायोजन सम्भव नभएको आशयको प्रतिक्रिया दिएका छन् ।’ २२ गते मधेश प्रदेश मन्त्रिपरिषद्का सम्पूर्ण सदस्य, सम्पूर्ण सांसदसहित सामूहिकरूपमा प्रदेश प्रहरी समायोजनका लागि ज्ञापनपत्र दिएर नेपाल सरकारलाई सात दिनको समयसीमा दिने उनले बताए । मन्त्री साहले प्रदेश प्रहरी समायोजन र सीडीओ प्रदेश मातहत ल्याएर मात्र चुनावमा जानुपर्ने अन्यथा आफूहरूको आन्दोलन प्रदेश र संघीय क्षेत्रसम्म पुग्ने भएकाले चुनाव समेत प्रभावित हुने बताए ।