Techie IT
×
गृहपृष्ठbreakingनेपाली कीर्ते नागरिकता बनाएर काठमाडौंमा मिठाइ पसलको नाममा अवैध धन्दा

नेपाली कीर्ते नागरिकता बनाएर काठमाडौंमा मिठाइ पसलको नाममा अवैध धन्दा


काठमाडौं । भारतीय नागरिकले नेपालमा विवरण छलेर ‘कीर्ते नागरिकता’ बनाई गैरकानुनी रूपमा करोडौँ रकमको चलखेल गरिरहेका छन् । जसमध्ये एक हुन् भरतप्रसाद गुप्ता ।

उत्तर प्रदेश बलिया जिल्ला, सिअर ब्लकस्थित इब्राहिमपट्टी गाउँका स्थायी बासिन्दा गुप्ताले कीर्ते विवरण पेश गरी २०६९ सालमा जन्मसिद्ध आधारमा नागरिकता लिएका थिए । नेपाली नागरिकता लिएपछि उनले मिठाइ पसल सञ्चालन गर्दै आफ्नो व्यवसाय अगाडि बढाएका थिए । देखिने मिठाइ पसल भए पनि उनी विभिन्न लागूऔषध, सुन तथा जग्गाको कारोबार गर्दै करोडौँको मालिक भएर अवैध धन्दा सञ्चालन गरिरहेका छन् ।

कसरी लिए नागरिकता ? भरत प्रसाद गुप्ताले २०६९ चैत २३ गते सिरहाबाट जन्मसिद्ध नागरिकता लिएका थिए । नागरिकतामा टोली प्रमुख दिलिप प्रसाद लामिछानेको हस्ताक्षर भई स्थायी ठेगाना सिरहाको रामनगर मिर्चैया–२ बाट तत्कालीन समयमा नागरिकता लिएका थिए । बाबु शिवशंकर गुप्ताको तीन छोरामध्ये कान्छो छोरा भरतले कीर्ते विवरण बनाएर सिरहाबाट जन्मसिद्ध नागरिकता लिएका हुन् ।

उनको न सिरहामा जन्म भएको हो, न उनको कुनै जग्गा जमिन वा घर नै सिरहाको रामनगर मिर्चैयामा छ । मिर्चैयाका मेयर श्रवणकुमार यादवले गुप्ताको साविक रामनगर मिर्चैया र अहिले परिवर्तित वडामा कुनै जग्गा जमिन वा स्थायी रूपमा बसेको नपाइएको जानकारी दिए ।

तर भरतले नागरिकता टोली गएको मौका छोपी कीर्ते विवरण बनाएर नागरिकता नम्बर– १५३०–९०/१०४ लिइ खुल्लमखुल्ला विभिन्न किसिमको अवैध धन्दा चलाई करोडौँ रकम भारत लगिरहेका हुन् ।

तर उनी २०५२ सालतिर भारतबाट खुर्सानी, आलु व्यापार गर्ने व्यापारीको सहयोगीको रूपमा नेपाल आएका थिए । २०४६ सालभन्दा अघिदेखि नेपालमा स्थायी बसोबास गरिरहेको विदेशीलाई जन्मसिद्ध नागरिकता दिने २०६३ को नागरिकता ऐनमा उल्लेख छ । तर उनले मोटो रकम खर्च गरेर सिरहाकै जिवछ साहको सहयोगमा नेपाली नागरिकता लिएको उनका आफन्तहरूको भनाइ छ । यसबारेमा भरतप्रसाद गुप्तालाइ सम्पर्क गर्दा उनी सम्पर्कमा आउन चाहेनन् ।

परिवारकै नेपाली नागरिकता : भारतीय नागरिक शिवशंकर गुप्ताका तीन छोरामध्ये जेठो मोहन प्रसाद गुप्ता, माइलो हरिनारायण गुप्ता र कान्छो छोरा भरत प्रसाद गुप्ता हुन् । जब भरतले जन्मसिद्ध नागरिकता लिए तब उनले भारतीय नागरिक रहेकी श्रीमती ज्ञानमति गुप्ताको समेत नागरिकता बनाएका छन् । जन्मसिद्ध नागरिकको छोराछोरीको नागरिकता बन्न कठिन हुने भए पनि भरतले पैसा खुवाएर छोरा राहुल गुप्ता, रोहित गुप्ता र छोरी माधुरी गुप्ताको नागरिकता बनाइदिएका छन् ।

जेठो दाइ मोहनप्रसादसँगै नेपाल आएका भरतले ठेलामा समोसा बेच्नेदेखि, अरूको पसलमा काम समेत गरे । जुन बेला भोटेबहालमा एक नेपालीलाई सामान्य विवादमा मोहन प्रसाद र भरत दुई दाजुभाइ मिलेर मरणासन्न हुने गरी कुटपिट गरेपछि ज्यान मार्ने उद्योगमा मुद्दा समेत चलेको थियो ।

मोहनप्रसाद र हरिनारायणले नेपाली नागरिकता लिएनन् तर भरतले कीर्ते विवरण बनाएर नागरिकता लिए । हरिनारायण इब्राहिमपट्टीमै राधेश्याम स्विट्स मिठाइ पसल चलाएर बसेका छन् भने मोहनको मृत्यु भइसकेको छ । जब २०६९ अघिसम्म नागरिकता थिएन, भरतले अरूको नामबाट वैध/अवैध दुवै काम गरे ।

देखाउने मिठाइ पसल काम अवैध धन्दा
बानेश्वर शंखमूलमा मिठाइ पसल सञ्चालन गरेका गुप्ताले १० वर्षमा करिब ८० करोडभन्दा बढी सम्पत्ति कसरी कमाए ? यो सम्पत्ति कमाउँदै गर्दा राज्यलाई कति कर तिरे ? यो प्रश्न गम्भीर छ । धेरै भारतीय नागरिकले भरतको झैँ कीर्ते विवरण बनाई नागरिकता लिएर मिठाइ पसलको देखाउने तर अवैध काम गरेर जग्गामा लगानी गरी अर्बौैँ रकम भारत पठाइरहेको तथ्य समेत खुलेको छ ।

भरतको शंखमूल मूल सडकमा अन्डरग्राउन्डसहित साढे आठ तला घर छ । उनको श्रीमती ज्ञानमती गुप्ताको नाममा २०७७ मा काठमाडौंको बाँनियाटारमा साढे पाँच आना जग्गा, बूढानीलकण्ठमा साढे २ तले घर, बनेपामा साढे २ रोपनी जग्गा, कीर्तिपुर सोखेलमा २६ आना जग्गादेखि विभिन्न बैंकमा करोडौँ रकम बचत छ । यो नागरिकता अनि सम्पत्तिको वैध स्रोत के हो ? राज्य बेखबर रहेको छ ।

संरक्षण साहको : नागरिकता बनाउने बेलादेखि सहयोग गरेका केही व्यक्ति अहिले उच्च पद र ओहोदामा छन् । तीमध्ये एक हुन् मधेश आयोगका सदस्य जीवछ साह । कुनै बेला गाविस अध्यक्ष भएका साह राष्ट्रपति विद्यादेवी भण्डारीको स्वकीय सचिव समेत भएर काम गरे । राष्ट्रपति भण्डारीको नाम बेचेर विभिन्न अवैध काम गर्दै आएका साहको संरक्षणमा भरतप्रसाद गुप्ताले आफ्नो कीर्ते र अवैध काम खुल्लमखुल्ला गरिरहेको बानेश्वरकै एक मिठाइ पसलेले जानकारी दिए ।

साह र गुप्ताको लगानीमा विभिन्न जग्गा समेत खरिद गरेको ती मिठाइ पसलेको भनाइ छ  । राष्ट्रपति भण्डारीको निगाहमा मधेश आयोगका सदस्य बनेका साह मधेश र मधेशीको हितको लागि भन्दा अवैध गतिविधिमा संलग्न भारतीय नागरिकलाई जोगाउन सक्रिय देखिएका छन् ।

भारतीय नागरिकलाई नेपाली नागरिक बनाउन सहयोग गरेको विषयमा शाहलाई प्रश्न गर्दा उनले यसमा आफ्नो संलग्नता नभएको र आफूले नागरिकता लिएको भनिएको भरत प्रसाद गुप्तालाई समेत नचिनेको बताए । उनले आर्थिक दैनिकसँग यस विषयमा आफूलाई किन जोडेको भनेर प्रतिप्रश्न गर्दै भने, ‘म पनि पत्रकारिता गरेको व्यक्ति हो । यसरी सिधै फोन गरेर आफूलाई थाहा नै नभएको विषयमा जोड्न पाइन्छ मलाई फोन नगर्नुस् ।’ त्यसो त मधेश आयोगका साह विभिन्न शीर्ष नेता तथा सुरक्षाकर्मीहरूसँग फोटो खिचेर सबै मिलाउने भन्दै बार्गेनिङ गर्ने गरेको सिरहाकै माओवादी नेताहरू समेत बताउँछन् ।


क्याटेगोरी : breaking, समाचार

तपाईको प्रतिक्रिया