क्रिप्टो कारोबारी अमित श्रेष्ठको पछाडि को–को छन् ?

काठमाडौं । गत असार २९ गते नेपालमा गैरकानुनी रहेको क्रिप्टो कारोबारको आरोपमा विशाल सिमेन्टका पूर्वसञ्चालक समेत रहेका व्यापारी अमित श्रेष्ठ पक्राउ परे । उनलाई नेपाल प्रहरीको उपत्यका अपराध अनुसन्धानबाट खटिएको प्रहरीले उनलाई काठमाडौंको पानीपोखरीस्थित उनकै निवासबाट पक्राउ गरेको थियो ।

अनुसन्धानका क्रममा उनबाट क्रिप्टोको सँगसँगै बैंक खाताबाट समेत शंकास्पद कारोबार गरेको भन्दै उनलाई बैंक तथा वित्तीय संस्थासम्बन्धी ऐन, २०७३ अनुसार अनुसन्धान अघि बढाइएको थियो ।

प्रहरीले पक्राउ परेका श्रेष्ठको एनआईसी एसिया बैंकको खाताबाट ६५ लाख २४ हजार रुपैयाँ, रोयल बैंक अफ क्यानडामा १८ लाख ७४ हजार अमेरिकी डलर, एभरेष्ट बैंकको खाताबाट दुई करोड छ लाख, वेल्स बैंक अफ अष्ट्रेलियाको खातामा एक लाख ९४ हजार अमेरिकी डलर, नबिल बैंकमा क्यानेडियन डलर ६७ हजार ५९६, नेपाली रुपैयाँ ६५ हजार, सेयर कारोबार, विभिन्न कम्पनीहरुमा सेयर लगानी तथा पानीपोखरीमा रहेको अपार्टमेन्टसमेत गरी चार लाख ४९ हजार अमेरिकी डलरबराबरको सम्पत्ति प्रहरीले सार्वजनिक गरेको थियो ।

उनै श्रेष्ठलाई मंगलबार जिल्ला अदालत काठमाडौंका न्यायाधीश नारायणप्रसाद शर्माको इजलासले पुर्पक्षका लागि थुनामा पठाउने आदेश दिएका छन् ।

क्रिप्टो कारोबार सँगैसँगै बैंक तथा वित्तीय संस्थासम्बन्धी करोडौँको गैरकानुनी कारोबार गरेका श्रेष्ठको पछाडि को–को छन् भन्ने प्रहरीले अनुसन्धानको क्रममा केही बताएको छैन ।

स्रोतका अनुसार श्रेष्ठको क्रिप्टो कारोबारलगायतको करोडौँको गैरकानुनी व्यवसायमा उच्च राजनीतिक दलका नेता, केही उच्चपदस्थ प्रहरी, पत्रकार तथा व्यापारीहरु समेत रहेका छन् ।

नेता, प्रहरी, पत्रकार तथा व्यापारीहरुले आफूहरुलाई जोगिनकै लागि श्रेष्ठलाई पक्राउ गराएको समेत स्रोतले दाबी गरेको छ । स्रोतका अनुसार प्रहरीको अनुसन्धानमा यस विषयमा केही बोलिएको छैन भने पक्राउ परेको व्यापारी अमित श्रेष्ठले समेत कसैको नाम बोलेका छैनन् ।