कोरोना लागे पनि विदेश जानेलाई अल्फा केयरले नेगेटिभ पीसीआर दिदैँ

काठमाडौं । काठमाडौंको नयाँ बानेश्वरमा रहेको अल्फा केयर फार्मेसीले कोरोना लागेका व्यक्तिलाई पनि कोरोना नलागेको भनेर रिपोर्ट दिएर जनस्वास्थ्यमाथि गम्भीर खेलबाड गरेको भेटिएको छ ।

केही दिनअघि काठमाडौं महानगरपालिकाका मेयर बालेन्द्र साहले डोजर लगाएर भत्काएको उक्त फार्मेसीमा सेटिङ्गमा जानेहरुले कोरोना परीक्षणको रिपोर्ट आफूहरुले चाहेजस्तो पाउने गरेको खुलासा भएको छ ।

ओम्नी काण्डमा समेत मुछिएका अल्फा बिटा भवनका मालिक द्विराज शर्मा सिवाकोटी र उनका दाजु युवराज शर्मा सिवाकोटीद्वारा सञ्चालित उक्त फार्मेसीले केही महिनाअघि मात्रै पीसीआर परीक्षणको अनुमति पाएको थियो । आर्थिक दैनिकलाई प्राप्त कागजातअनुसार उक्त फार्मेसीले विमानस्थल हुँदै विभिन्न मुलुक जाने यात्रुलाई नै लक्षित गरेर कोरोना नेगेटिभ रहेको रिपोर्ट दिने गरेको हो ।

आर्थिक दैनिकलाई प्राप्त कागजात अनुसार अल्फा केयर फार्मेसीले सुरुमा फर्म भर्दा नै बदमासी गर्ने गरेको छ । उक्त फर्ममा विदेश जाने यात्रुले प्रयोजन समेत खुलाएर फर्म भरेपछि कोरोना नेगेटिभ रहेको रिपोर्ट दिइने गरेको छ । कोरोना लागेका व्यक्तिहरुले परीक्षण गरे पनि विदेश जाने प्रयोजन खुलाइएको फर्म भएकाहरुले भने कोरोना नलागेको रिपोर्ट लिने गरेका छन् ।

एक यात्रुले भारत जाने क्रममा अल्फा केयर अस्पतालमा कोरोना परीक्षण गराउँदा उक्त फार्मेसीको बदमासीको पोल खुलेको हो । ती यात्रुले सुरुमै फर्म भर्दा वैदेशिक प्रयोजनका लागि भनेर फर्म भर्नुपरेको थियो । त्यसलगत्तै उनलाई १५ सय रुपैयाँ शुल्क लिएर स्वाब संकलन गरिएको थियो । भोलिपल्टको उडान भएका कारण ती यात्रु भोलिपल्ट बिहानै उक्त फार्मेसीमा पुगेर रिपोर्ट ल्याए । तीनवटा परीक्षणमा सबै नेगेटिभ भएको रिपोर्टमा देखियो । सोही रिपोर्ट लिएर उनी त्रिभुवन विमानस्थल हुँदै दिल्ली प्रस्थान गरे ।

भारतको नयाँ दिल्लीस्थित इन्दिरा गान्धी अन्तर्राष्ट्रिय विमानस्थलमा अवतरण भएपछि उक्त विमानस्थलले पनि कोरोना परीक्षणका लागि छुट्टै स्टेसन खडा गरेको थियो । जेनेस्ट्रिङ डाइग्नोस्टिक सेन्टर प्रालिले प्रतिव्यक्ति तीन सय भारतीय रुपैयाँ लिएर पीसीआर परीक्षण गर्दै थियो । स्वाब संकलन गरेपछि केही बेरमा इमेलमै रिपोर्ट प्राप्त भयो । उक्त रिपोर्टमा भने सार्स कोभिड २ पोजिटिभ देखिएको थियो । जब कि अन्य रिपोर्ट भने नेगेटिभ थियो । यता अघिल्लो दिन अल्फा केयरमा गरिएको परीक्षणमा भने सार्स कोभिड २ नेगेटिभ देखिएको थियो ।

शुल्क फरक–फरक !

भारतमा कोरोना परीक्षण निकै सस्तो र अत्याधुनिक छ । तर, नेपालका सबैजसो कोरोना परीक्षण गर्ने ल्याबहरुले भने चर्को शुल्क लिने गरेका छन् । भारतीय विमानस्थलमा रहेको ल्याबले प्रतिव्यक्ति तीन सय रुपैयाँ भारु लिँदै आएको छ । तर, बानेश्वरस्थित अल्फा केयर १५ सय रुपैयाँ नेपाली असुल्दै आएको छ । यता बिध ल्याबले प्रतिव्यक्ति दुई हजार रुपैयाँसम्म असुली गर्दै आएको छ । बिध ल्याबमा गरिएको लगानी नै शंकास्पद भएको भन्दै सञ्चालक भीमकान्त भण्डारीलाई त अख्तियार दुरुपयोग अनुसन्धान आयोगले विशेष अदालतमा मुद्दा नै दायर गरिसकेको छ ।

अल्फा केयरसँगअल्फा बिटाको कनेक्सन !
मेयर बालेन साहसँग चर्काचर्की गर्न आउने पात्र हुन् द्विराज शर्मा । उनी अल्फा केयरका मालिक हुन् । त्यस्तै उनको स्वामित्वमा अल्फा बिटा नामक एजुकेसन कन्सल्टेन्सी समेत सञ्चालनमा छ । त्यहाँबाट शैक्षिक परामर्श लिएर विदेश जाने अधिकांश विद्यार्थीले अल्फा केयरकै पीसीआर रिपोर्ट लिने गरेका छन् ।

एकै व्यक्तिले फार्मेसीको नाममा ल्याब खोल्नु र फर्ममै वैदेशिक प्रयोजन खुलाउने व्यवस्था गरेर परीक्षण गराउनुमा स्वार्थको द्वन्द्व देखिन्छ । सरकारी निकायले अल्फा केयरको सबै रिपोर्ट छानबिनमा ल्याए शर्मामाथि कारबाही हुनसक्ने देखिएको छ ।