राजस्व चुहावट आरोपमा चार जनाविरुद्ध १८ लाख बिगो माग

काठमाडौं । राजस्व अनुसन्धान विभागले राजस्व चुहावटको आरोपमा चार जनाविरुद्ध मुद्दा दायर गरेको छ । विभागले मंगलबार ललितपुर, धापाखेल बस्ने रामशरण बोगटीसहित चार जनाविरुद्ध उच्च अदालत पाटनमा मुद्दा दायर गरेको हो ।बोगटीसहित ललितपुर, इमाडोल बस्ने नमराज तिमिल्सना, अछामका तीर्थराज ढकाल र सिरहाका अमितकुमार साहले राजस्व चुहावट गरेको विभागको आरोप रहेको छ । बोगटी नुवाकोट लुखु–३ र तिमिल्सैना अछाम, पञ्चदेवल विनायक–१ का हुन् ।

उनीहरूले भारतमा उत्पादित बिल बीजक तथा भन्सार प्रज्ञापनपत्र लगायतका कागजात नभएका २४ कार्टुन रजनीगन्धा, दर्ता भएभन्दा फरक नम्बरको प्लेटको ढुवानी साधनको प्रयोग गरेको पाइएको छ । उनीहरुले तीन सय ११ किलो रजनीगन्धा काठमाडौंमा बिक्री गर्ने उद्देश्यअनुरुप ल्याइएका हुन् ।

जसमा नेपाली सेनाको लोगोसहितको ब्यानर समेत टाँस गरी ढुवानी गरेर काठमाडौं लगायतका क्षेत्रमा बेचबिखन गर्ने र सोबाट प्राप्त हुने आयमा प्रचलित कानुनबमोजिम नेपाल सरकारलाई तिर्नुपर्ने राजस्व नतिरी राजस्व चुहावट गरेको विभागले जनाएको छ । उनीहरुले राजस्व चुहावट (अनुसन्धान तथा नियन्त्रण) ऐन, २०५२ (संशोधनसहित) दफा ३ र ४ बमोजिम राजस्व चुहवाट गरेको विभागको भनाइ छ ।
सोसँगै विभागले १८ लाख ४६ हजार ७३४ रुपैयाँ बिगो कायम गरी उनीहरू चार जनाविरुद्ध मुद्दा दायर गरेको छ । सामानसहित बरामद गरिएको ट्रक समेत जफत गरिने विभागको भनाइ छ । उनीहरुलाई जरिवानाका साथै कैद सजायको समेत माग गरिएको छ ।