दोलखा । कृषिमा स्नातक अध्ययन सेकका भीमेश्वर नगरपालिका–४ जिलुका सचिन चौलागाई कृषि पेसा अँगालेका छन् । गाउँमा वैदेशिक रोजगारीको लहर चलेको लामो समय भयो । उनका साथीहरू पनि लहडमै भए पनि काम गर्नका लागि विदेश गएका/जाने क्रममा छन् । तर चौलागाई भने आफ्नो अध्ययनलाई व्यवहारमा उतार्न लागेका छन् ।
गतवर्ष मात्रै तीनवर्षे बालीविज्ञानमा स्नातक सकेका चौलागाईले गतवर्षदेखि गाउँमा गोलभेँडा खेती सुरु गरेका थिए । सँगै पढेका साथी विदेश जाने तयारी गरिरहँदा चौलागाई भने खेतमा गोलभेँडाको टनेल बनाउन व्यस्त देखिन्छन् । गतवर्ष उनको फार्ममा लटरम्म फलेको गोलभेँडा देख्दा गाउँका अन्य छिमेकी तथा उनका साथी पनि अचम्मित भएको चौलागाईले सुनाए ।
गत वर्ष छ लाख लगानी गरेर गोलभेँडाको खेती सुरु गरेका हुन् । सुरुको वर्षमै राम्रो आम्दानी गर्न सफल भएपछि उनले हाल खेतीलाई अझ विस्तार गरेका छन् । साथै उनले उत्पादन गरेका गोलभेँडा जिल्लामा नै खपत भएपछि उनलाई बजारको पनि समस्या भएन । साथै उनको व्यावसायिक खेतीको अवलोकन गर्न भीमेश्वर नगरपालिकाका मेयर समेत उनको फार्ममा पुग्ने गरेका छन् ।
उनलाई सबै प्रकारका बाली तथा तरकारी खेती गर्ने तरिका थाहा छ तर गोलभेँडाको बजार राम्रो रहेकोले सुरुमा यसैको खेती गर्न लागेको उनी बताउँछन् । हिजोआज उनको दैनिकी गोलभेँडाको टनेलको स्याहार सुसार तथा नयाँ बिरुवा लगाउनेमै बित्ने गर्छ ।
भर्खर २२ पुगेको चौलागाईले गतवर्ष नै १२ लाख रुपैयाँबराबरको गोलभेँडा उत्पादन गरेर बिक्री गरेका थिए । चार रोपनीबाट सुरु भएको उनको व्यवसाय फस्टाउँदै अहिले ७ रोपनीमा पुगेको छ । यसवर्ष उनले व्यवसायमा लगानी वृद्धि गर्दै तीन रोपनी जग्गा थप गरेर ६० वटा गोलभेँडाको टनेल हालेका छन् । सुरुको वर्ष नै राम्रो आम्दानी लिएका उनले छ लाखको व्यवसायलाई २५ लाखमा पु-याएको बताए ।
गोलभेँडाखेतीमा टनेल निर्माण, मल, बीउ, कीटनाशक औषधिसहित यसवर्ष लगानी करिब २५ लाख पुग्ने उनको भनाइ छ । पढेको सीपलाई सदुपयोग गरेर आफूलाई कृषिमै आत्मनिर्भर बनाउन व्यवसायमा लगानी वृद्धि गरेको उनले बताए ।
यस्तै उनलाई स्थानीय सरकारको आंशिक सहयोग समेत गरेको छ । प्रदेश र केन्द्र सरकारबाट पाउने सहयोग तथा अनुदान भने उनले लिएका छैनन् । उनलाई गतवर्ष प्रोत्साहनस्वरूप वडाबाट २५ हजार रूपैयाँ सहयोग मिलेको थियो ।
‘तीन वर्ष बाली विज्ञान अध्ययन गर्दा सिकेका प्राविधिक ज्ञान र सीपलाई सदुपयोग गर्ने योजना बनाई कृषि पेसामा हात हालेको हुँ सफल भइरहेको छु र भोलिको दिनमा सफलता पाउने मैले विश्वास लिएको छु’, चौलागाइले भने, ‘मुलुककै कृषि पेसामा योगदान गर्ने रहर भएको हुँदा विदेश जाने सोच छैन ।’
क्याटेगोरी : समाचार
ताजा अपडेट
- कांग्रेस नेता अफताब आलमलाई जन्मकैदको सजाय
- मुख्यमन्त्री कँडेललाई विश्वासको मत
- आगलागीबाट ७९ घर जले, एकको मृत्यु
- उपनिर्वाचनमा सेना परिचालन गर्न स्वीकृति प्रदान
- डेभलपमेण्ट बैंकर्स एशोसिएसन नेपालको प्रमुख कार्यकारी अधिकृतमा डंगोल नियुक्त
- सिटिजन लाइफद्वारा जेन जेड लक्षित कार्यक्रम सञ्चालन
- सय दिनको रोजगारीको लागि १५ हजार बढीको आवेदन
- सूर्य नेपाल काठमाडौं ओपनको दोस्रो दिन दिनेश र भुवन शीर्षस्थानमा
धेरैले पढेको
- समसामयिक राजनीतिक व्यङ्ग्य
- राजेन्द्र विमल र हरिहर शर्मालाई पुरस्कृत गरिने
- ढोरपाटन जोड्ने सडक कालोपत्रे गरिँदै
- युनिश शाहीको गीत ‘धारिलो तिर˝ को भ्युज वान मिलियन नाघ्यो
- एक्सेल डेभलपमेन्ट बैंकको ट्राफिक प्रहरीलाई सहयोग
- चिया पसल पनि कम्पनी ?
- इन्फिनिटी लघुवित्तको सातै प्रदेशमा तालिम सम्पन्न
- नेकपा माओवादी केन्द्र कंचनपुर-काठमाडौ सम्पर्क समन्वय समितिको पाचौं भेला सम्पन्न
तपाईको प्रतिक्रिया