विमानस्थल आन्तरिक टर्मिनलका प्रमुख अख्तियारको नियन्त्रणमा

काठमाडौं । त्रिभुवन अन्तर्राष्ट्रिय विमानस्थलका एक कर्मचारी घुस प्रकरणमा सोमबार पक्राउ परेका छन् । विमानस्थलको नागरिक उड्डयम कार्यालय आन्तरिक टर्मिनल व्यवस्थापन शाखाप्रमुख प्रबन्धक पूर्ण प्रसाद चुडाललाई सोमबार अख्तियारको टोलीले कार्यकक्षबाटै पक्राउ गरेको हो ।

चुडालले एयरपोर्टको आन्तरिक टर्मिनलसम्म आवतजावत गर्न पास उपलब्ध गराई सहजीकरण गरिदिएको भनी सेवाग्राहीसँग एक लाख ५० हजार घुस लिएको अख्तियारको दाबी छ । अख्तियारले पक्राउ गरेर थप खानतलासी गर्दा प्रमुख चुडालको कार्यकक्षको दराजबाट स्रोत नखुलेको आठ लाख रुपैयाँ फेला परेको छ ।

अख्तियारका प्रवक्ता श्याम प्रसाद भण्डारीका अनुसार चुडालले एक लाख ५० हजार रुपैयाँ घुस लिएको उजुरी परे पनि घुस लिएको सो रकम भने फेला परेको छैन । उजुरीकर्ताले घुस दिएको रकमको नम्बर अख्तियारलाई उपलब्ध गराए पनि सो नम्बरका नोटहरु भने फेला नपरेको अख्तियारको भनाइ छ । अख्तियारले चुडालको बारेमा थप अनुसन्धान भइरहेको बताएको कारण अन्य कुरा अनुसन्धान गरेर बाहिर ल्याउने जनाएको छ ।