राष्ट्र बैंकका संस्थापक गभर्नर राणाको निधन

काठमाडौं । नेपाल राष्ट्र बैंकका पहिलो गभर्नर हिमालयशमशेर राणाको आइतबार बिहान निधन भएको छ । काठमाडौंको थापाथलीस्थित नर्भिक अस्पतालमा उपचारका क्रममा ९५ वर्षीय राणाको निधन भएको हो ।

उनी निमोनियाको उपचारको लागि अस्पताल भर्ना भएका थिए ।हिमालय बैंकका संस्थापक राणा नेपालको पहिलो अर्थसचिवसमेत हुन् । पछिल्लो समय राणा नागरिक समाजको अगुवाका साथै आमनिर्वाचन पर्यवेक्षक समितिका संस्थापकका रूपमा क्रियाशील थिए । राणाका दुई छोरा र दुई छोरी छन् ।

यसैबीच, प्रधानमन्त्री पुष्पकमल दाहाल र उपप्रधानमन्त्री तथा अर्थमन्त्री विष्णुप्रसाद पौडेलले नेपालका प्रथम गभर्नर हिमालयशमशेर राणाको निधनबाट मुलुकको बैंक, वित्तीय एवं समग्र अर्थ क्षेत्रमा अपूरणीय क्षति पुगेको बताएका छन् । नेपालभित्र नेपाली नोट प्रचलनमा ल्याउन राणाको महत्वपूर्ण भूमिका रहेको मानिन्छ । उनी गभर्नर हुनुअगाडि नेपालमा भारतीय नोटको अत्यधिक प्रचलन थियो ।