जेपीका प्रअ पौडेलले नाङ्लोसँगको ‘लिज एग्रिमेन्ट’ गायब पारेको खुलासा

काठमाडौं । ठमेलमा रहेको जेपी स्कुलका प्रधानाध्यापक लक्ष्मण पौडेलले नाङ्लो समूहका श्याम कक्षपतिसँग गरेको ‘लिज एग्रिमेन्ट’ गायब पारेर तरुण निर्माण सेवाका मनोज मिश्रसँग नयाँ लिज एग्रिमेन्ट गरेको रहस्य खुलेको छ ।

स्कुलको जमिन तरुण निर्माण सेवालाई लिजमा दिँदा भएको अनियमितता र लिज एग्रिमेन्टअनुसार काम नभएको विषयमा परेको उजुरीबारे राष्ट्रिय सतर्कता केन्द्रले प्रधानाध्यापक पौडेलसँग निरन्तर बयानका क्रममा कक्षपतिसँगको एग्रिमेन्ट नै गायब पारिएको तथ्य खुलेको हो ।

नाङ्लोका कक्षपतिसँग विद्यालयका तत्कालीन प्रधानाध्यापक सूर्यराज शाक्यले करार सम्झौता गरेका थिए र उक्त करार सम्झौतालाई वि.नि. तारापति खरेल लेखापाल राम श्रेष्ठ वडा अध्यक्ष मुकुन्द रिजाल र यसअघिका व्यवस्थापन समितिका अध्यक्ष कुमार मानन्धरलगायतको मिलेमतोमा कायम गरिएको थियो ।