प्रधानमन्त्री दाहाललाई राष्ट्रिय स्वतन्त्र पार्टीले पनि विश्वासको मत दिने

काठमाडौं । आइतबार बसेको राष्ट्रिय स्वतन्त्र पार्टीको केन्द्रीय समिति र संसदीय दलको संयुक्त बैठकले प्रधानमन्त्री पुष्पकमल दाहाल ‘प्रचण्ड’ लाई विश्वासको मत दिने निर्णय गरेको छ।

सोमबार प्रतिनिधि सभामा प्रधानमन्त्री प्रचण्डले विश्वासको मत लिँदै छन्। यसअघि रास्वपाले पुस २६ गते प्रधानमन्त्री प्रचण्डलाई विश्वासको मत दिएको थियो। माघ २२ गते प्रचण्ड सरकारबाट बाहिरिए पनि रास्वपाले प्रधानमन्त्रीलाई दिएको विश्वासको मत भने कायम राखेको थियो।

पुस १० गते बनेको तत्कालीन ७ दलीय गठबन्धन फुटेर नयाँ गठबन्धन बने पनि रास्वपा नयाँ गठबन्धनमा सहभागी छैन। प्रधानमन्त्री प्रचण्डलाई विश्वासको मत दिने निर्णय गरेसँगै रास्वपा फेरि सरकारमा सहभागी हुने सम्भावना छ।