व्यवसायी कोचरको करोडौंको कारोबार, राजस्व भने न्यून बुझाए

विराटनगर । विराटनगरको एक व्यापारिक घरानाका व्यक्तिले करोडौँको कारोबार गरी राजस्व भने न्यून तिरेर कर छली गरेको पाइएको छ । महाबीर ट्रेडलिंकले आफ्नो व्यावसायिक कारोबारबाट करोडौँ कमाउन सफल भएको देखिए पनि चालू आर्थिक वर्षको छ महिनाको कारोबार विवरणमा भने न्यून देखाएको पाइएको हो ।

प्लास्टिजन्य कारोबार गर्ने उक्त कम्पनीले वास्तविक कारोबारलाई लुकाएर न्यून विवरण कर कार्यलयमा बुझाएको छ । आन्तरिक राजस्व कार्यालय विराटनगरबाट भ्याटमा दर्ता भएर महावीर ट्रेडलिंकका नाममा ६०३६५५४५२ भ्याट नम्बर समेत प्राप्त गरेको उक्त फर्मले विभिन्न वस्तुु आयात गरी बिक्री गर्दा पूर्णरुपमा स्टीमेट बिलको प्रयोगबाट गर्नेगरेको छ । उक्त फर्मका सञ्चालक तुुषार कोचर रहेका छन् भने उनले आफूसँगै आफ्ना बाबुु निर्मल कोचरका नाममा आन्तरिक राजस्व कार्यालयबाट ३००२१०३९४६ बाट हरिराम इन्टरप्राइजेज नामको अर्को एक फर्म दर्ता गरी व्यावसायिक कारोबार गरिरहेका छन् ।

दुुवै कोचर व्यवसायीलाई गोल्छा समूहका सुरेन्द्र गोल्छाले कारोबारमा राम्रै साथ दिनेगरेका छन् । गोल्छाको सहयोगले गर्दा नै कोचरले दुुवै फर्मबाट निर्बाधरुपमा आफ्नो व्यवसायी कारोबार गरी राज्यलाई बुझाउनुपर्ने करोडौँको भ्याटदेखि आयकर समेतमा व्यापक छली गरेको पाइएको हो । करछलीको विषयमा आन्तरिक राजस्व कार्यालय विराटनगरले उच्च महत्वका साथ छानबिन गर्न थालेको समाचारस्रोतले बताएको छ ।