महासंघको कोशी प्रदेश अध्यक्षमा राउत

विराटनगर । नेपाल उद्योग वाणिज्य महासंघ कोशी प्रदेशको अध्यक्षमा राजेन्द्र राउत निर्विरोध निर्वाचित भएका छन् । स्थापनाकालदेखि नै महासंघको वरिष्ठ उपाध्यक्षमा निर्वाचित भएर काम गरिसकेका उद्योगी राउत यस पटक प्रदेश अध्यक्षमा निर्विरोध निर्वाचित बनेका हुन् ।

झापा जिल्लाको बिर्तामोडमा बसेको उद्योग वाणिज्य महासंघको पाँचौँ प्रदेशसभाले राउतसहित अन्य पदाधिकारी पनि सर्वसम्मत चयन गरेको महासंघ कोशी प्रदेशका निर्देशक राधारमण भण्डारीले जानकारी दिए । उनका अनुसार कोशी प्रदेश समितिको उपाध्यक्षमा भीम बहादुर पौडेल र कुमारमणि पोखरेल र कोषाध्यक्षमा सुवास आचार्य निर्वाचित भएका छन् ।

यस्तै सदस्यहरुमा जिल्ला तथा नगर उद्योग वाणिज्य महासंघको प्रतिनिधित्व गर्दै ध्रुवलाल श्रेष्ठ, वीरेन्द्र कुमार साह, प्रीतम खड्गी, प्रकाश शिवाकोटी र ऋषिराज तिम्सिना निर्वाचित भएका छन् भने वस्तुगत तर्फबाट राजन श्रेष्ठ र दिपक पाण्डे तथा एसोसिएट्स तर्फबाट रवीन कुमार दाहाल, भवीश कुमार श्रेष्ठ र श्रवण अग्रवाल सदस्यमा सर्वसम्मत निर्वाचित भएका छन् । अध्यक्षमा निर्वाचित उद्योगी राउत एक महिनाअगाडि मात्रै उदयपुर जिल्लाको कटारीस्थित उदयपुर उद्योग वाणिज्य महासंघको अध्यक्षमा पनि सर्वसम्मत निर्वाचित भएका थिए ।