बीमा कम्पनीले उठाए एक खर्ब ३४ अर्ब

काठमाडौं । कुल बीमा शुल्क संकलन झण्डै तीन प्रतिशतले बढेको छ । नेपाल बीमा प्राधिकरणका अनुसार सञ्चालनमा रहेका १७ वटा जीवन बीमा र १६ वटा निर्जीवन गरी ३३ वटा कम्पनीहरुले चालू आर्थिक वर्षको चैत मसान्तसम्म कुल एक खर्ब ३४ अर्ब ७४ करोड ९६ लाख ६२ हजार रुपैयाँ बीमा शुल्क आर्जन गरेका छन् ।

प्राधिकरणका अनुसार यो बीमा शुल्क गत आर्थिक वर्षको सोही अवधिको तुलनामा दुई दशमलव ६७ प्रतिशतले बढी हो । गत आर्थिक वर्षको सोही अवधिमा बीमा कम्पनीहरुको कुल बीमा शुल्क संकलन एक अर्ब ३१ अर्ब २४ करोड १३ लाख आठ हजार रुपैयाँ रहेको थियो ।

प्राधिरणका अनुसार चालू आर्थिक वर्षको चैत मसान्तसम्म कुल जीवन बीमा शुल्क संकलन गत आर्थिक वर्षको सोही अवधिको तुलनामा दुई दशमलव १४ प्रतिशतले बढेको छ । सो अनुसार गत आर्थिक वर्षको चैत मसान्तसम्म जीवन बीमा कम्पनीहरुले कुल एक खर्ब दुई अर्ब ५४ करोड एक लाख ४२ हजार रुपैयाँ बीमा शुल्क संकलन गरेकोमा चालू आर्थिक वर्षको तेस्रो त्रैमासिकसम्म एक खर्ब चार अर्ब ७३ करोड ४८ लाख २१ हजार रुपैयाँ उठाएका छन् ।

प्राधिकरणका अनुसार निर्जीवन बीमा कम्पनीहरुले संकलन गरेको कुल बीमा शुल्क रकम पनि पछिल्लो अवधिमा चार दशमलव ५८ प्रतिशतले बढेको छ । गत आर्थिक वर्षको चैत मसान्तसम्म २८ अर्ब ७० करोड ११ लाख ६६ हजार रुपैयाँ बीमा शुल्क आर्जन गरेका निर्जीवन बीमा कम्पनीहरुले चालू आर्थिक वर्षको तेस्रो त्रैमासिकसम्म ३० अर्ब एक करोड ४१ लाख २१ हजार रुपैयाँ पुगेको छ ।

प्राधिकरणका अनुसार चालू आर्थिक वर्षको पछिल्लो अवधिमा जारी भएको कुल जीवन बीमा लेखको संख्या २० दशमलव १४ प्रतिशतले बढेको छ । सो अनुसार २०७८ चैत मसान्तसम्ममा कुल एक करोड १७ लाख ९१ हजार छ सय ९८ वटा जीवन बीमालेख जारी भएकोमा चालू आर्थिक वर्षको पछिल्लो अवधिमा यस्तो बीमालेखको संख्या बढेर एक करोड ४१ लाख ६५ हजार नौ सय ९८ पुगेको छ ।

जारी भएको कुल बीमालेखमध्ये जीवन बीमाको तुलनामा निर्जीवन बीमालेखतर्फको वृद्धि भने नकारात्मक देखिएको छ । प्राधिकरणका अनुसार चालू आर्थिक वर्षको चैत मसान्तसम्म जम्मा २१ लाख ६६ हजार तीन सय २८ निर्जीवन बीमालेख जारी भएको छ । जारी भएको यो बीमालेख गत आर्थिक वर्षको सोही अवधिको तुलनामा शून्य दशमलव ४२ प्रतिशतले कम हो । गत आर्थिक वर्षको सोही अवधिमा कुल २१ लाख ७५ हजार चार सय १४ वटा निर्जीवन बीमालेख जारी भएको थियो ।

जारी भएको कुल बीमालेख र कुल बीमा शुल्कको आधारमा चालू आर्थिक वर्षको पछिल्लो अवधिमा बीमाको दायरामा आएको कुल जनसंख्या ४४ दशमलव ५५ प्रतिशत रहेको छ । यसअन्तर्गत म्यादी, लघु, म्यादी र वैदेशिक रोजगार जीवन बीमालेख समावेश भएको प्राधिकरणको भनाइ छ । गत आर्थिक वर्षको सोही अवधिमा भने बीमाको दायरामा आएको जनसंख्या प्रतिशत ३७ दशमलव ३५ प्रतिशत रहेको थियो ।