मन्त्रालयगत बजेट सूचना प्रणाली जेठ १६ सम्म बन्द

काठमाडौं । अर्थ मन्त्रालयले आर्थिक वर्ष २०८०/८१ को बजेट तयारी अन्तिम चरणमा रहेको भन्दै मन्त्रालयगत बजेट सूचना प्रणाली (एलएमबीआईएस) बन्द गरेको छ । मन्त्रालयले एक सूचना जारी गरी जेठ ११ देखि १६ गतेसम्म मन्त्रालयगत बजेट सूचना प्रणाली बन्द रहने जनाएको हो । मन्त्रालयले सचिवस्तरीय निर्णयबाट प्रणाली बन्द गरेको हो ।

वार्षिक बजेट प्रणालीमा आबद्ध रहेर सरकारी स्रोतबाट कार्यान्वयन हुनेगरी तय गरिएका सम्पूर्ण कार्यक्रमहरूको तयारी एवं सोका लागि आवश्यक बजेट रकमको विनियोजन कार्यमा सहजता ल्याउने उद्देश्यका साथ विकास गरिएको कम्प्युटर प्रणालीमा आधारित प्रणाली एलएमबीआईएस हो ।

यस प्रणालीमार्फत वार्षिक कार्यक्रम कार्यान्वयन गर्ने निकाय, सम्बन्धित तालुक विभाग/मन्त्रालय, राष्ट्रिय योजना आयोग र अर्थ मन्त्रालय समेत एउटै प्रणालीमा रहेर बजेट तर्जुमासम्बन्धी कार्य हुन्छ । मन्त्रालयले नयाँ बजेटको तयारीमा लाग्नुपर्ने भएपछि प्रणाली बन्द गर्नुपरेको जनाएको छ । सरकारले जेठ १५ गते आगामी आर्थिक वर्षको बजेट सार्वजनिक गर्नेछ ।