राष्ट्रपतिबाट विवादित नागरिकता विधेयक प्रमाणीकरण

काठमाडौं । विवादित नागरिकता विधेयक राष्ट्रपति रामचन्द्र पौडेलले प्रमाणित गरिदिएका छन् । प्रधानमन्त्री पुष्पकमल दाहाल प्रचण्डको भारत भ्रमणको दिन उक्त विधेयक राष्ट्रपतिले प्रमाणीकरण गरिदिएका हुन् । नेपाल नागरिकता ऐन, २०६३ लाई संशोधन गर्न बनेको उक्त विधेयक प्रमाणीकरण भएपछि त्यसको पक्ष र विपक्षमा नेपाली समाज बाँडिन पुगेको छ ।

गत २०७९ साउन १५ गते प्रस्तुत नेपाल नागरिकता ऐन, २०६३ लाई संशोधन गर्न बनेको नेपाल नागरिकता (पहिलो संशोधन) विधेयक, २०७९ संघीय संसद्को दुवै सदनबाट पारित भएको थियो । प्रतिनिधिसभाका तत्कालीन सभामुखबाट साउन १५ गते प्रमाणित गरी तत्कालीन राष्ट्रपति विद्यादेवी भण्डारीसमक्ष प्रमाणीकरणका लागि पेस भएको थियो । केही विषयमा ध्यानाकर्षणसहित पुनर्विचारका लागि संघीय संसद्मा फिर्ता पठाइएकोमा ध्यानाकर्षण गराइएका विषयमा संघीय संसद्का दुवै सदनमा छलफल गरी प्रमाणीकरणका लागि पुनः भदौ २० गते राष्ट्रपतिसमक्ष पठाइएको थियो । तर, आफूले उठाएको विषय सम्बोधन नभएको भन्दै राष्ट्रपति भण्डारीबाट पुनः आएको विधेयक प्रमाणीकरण गरेकी थिइनन् । भण्डारीले उक्त विधेयक प्रमाणीकरण नगरेपछि एउटा पक्षले त्यसको स्वागत गर्दै आएको थियो ।