मिटरब्याजी पाण्डेलाई बैंकबाट विशेष कर्जा सुविधा !

काठमाडौं । स्रोत नखुलेको कालोधनको कारोबारबाट रातारात धनी बनेका रूपेश पाण्डेले बैंक तथा वित्तीय संस्थाबाट सेटिङमा करोडौँ रुपैयाँ कर्जा लिएर मिटरब्याजमा लगानी गर्नेगरेको पाइएको छ ।

वीरगञ्जमा पोके व्यापारीबाट व्यावसायिक यात्रा सुरु गरेका पाण्डेले प्रहरीको संरक्षणमा सारीलगायतको तस्करी गरेका थिए । अहिले देखावटीरूपमा न्युरोडमा जय अम्बे सारी सोरुम र दरबारमार्गमा इटालियन सामानको पसल दामिलानो खोलेर त्यसैलाई कन्ट्याक्ट प्वाइन्ट बनाएर मिटरब्याजको धन्दा चलाउँदै आएका छन् ।

पाण्डेले पछिल्लो समय बैंकका सीईओहरूलाई प्रभावमा पारेर कन्ट्याक्ट प्वाइन्टका रूपमा रहेका ती पसललाई देखाएर करोडौँ रुपैयाँ कर्जा लिएको बुझिएको छ । सेटिङमा कर्जा लिएको हुनाले किस्ता नतिर्दा समेत बैंकले पाण्डेलाई अरु व्यवसायीलाई जस्तो दबाबमूलक ताकेता गर्ने नगरेको थाहा भएको छ ।

पाण्डेको व्यवसाय देखावटी मात्र रहेको व्यवसायीहरू बताउँछन् । पाण्डेले व्यवसाय देखाएर बैंकबाट १२ प्रतिशत ब्याजमा कर्जा लिएको रकम व्यवसायमा लगानी नगरी मिटरब्याजमा लगानी गरेर पछिल्लो समय धेरै व्यवसायीहरूलाई दुःख दिइरहेको बताइएको छ ।

तरलताको अभाव देखाएर बैंकहरूले सर्वसाधारण व्यवसायीहरूलाई कर्जा दिन आनाकानी र कर्जा लिएकालाई तारन्तारको ताकेता गरे पनि मिटरब्याजी पाण्डेलाई चाहिँ त्यसो नगरेर विशेष सुविधा प्रदान गर्नेगरेको बुझिएको छ । पाण्डेले एउटा बैंकका सीईओसँग कुरा नमिल्नेबित्तिकै सजिलै अर्को बैंकमा कर्जा सार्ने गरेका छन् । मिटरब्याजी पाण्डेले बैंकहरूबाट पाएको विशेष कर्जाको सुविधा पनि शंकाको घेराभित्र तानिन पुगेको छ ।