राष्ट्र विरोधी अपराधमा संलग्न व्यक्तिलाई कारबाही गर्नुपर्छ : महेश बर्तौला

काठमाडौं । राष्ट्रिपति रामचन्द्र पौडेल र प्रधानमन्त्री पुष्पकमल दाहालले भारतका अगाडि घुँडा टेके भनेर नेकपा एमालेका महेश बर्तौलाले आरोप लगाएका छन् । उनले यस्तो राष्ट्र विरोधी अपराधमा संलग्न भएका व्यक्तिलाई कारबाही गर्नुपर्ने बताए ।

भारत भ्रमणका लागि जानु केही क्षण अगाडीमात्र नागरिकता ऐन जारी भएकाले प्रधानमन्त्री र राष्ट्रपतिले कसका अगाडि घुँडा टेके भन्ने प्रष्टै भएको उनको भनाइ छ । उनले केपी शर्मा ओली प्रधानमन्त्री भएको बेला नेपालको कालापानी, लिपुलेक र लिम्पीयाधुरा समेटेर नेपालको नक्सा जारी भएको र सो नक्सालाई संविधानको अंगको रुपमा समावेश गरिएको उल्लेख गरे ।

उनले भने, ‘नेपालको सरकार वा प्रधानमन्त्रीलाई नेपालको कुनै पनि भुभाग अन्य कुनै मुलुकलाई दान दिने वा सट्टापट्टा गर्ने अधिकार छैन र मन्त्री परिषद स्वयंले समेत यस्तो अधिकार प्रचण्डलाई दिएको भन्ने कुरा सार्वजनिक भएको थिएन ।’

उनले प्रधानमन्त्री प्रचण्डले भारत भुमिमा रहेको अवस्थामा एकतर्फि रुपमा नेपालको भुभाग माथीको दावि छाड्ने अभिव्यक्ति दिनु भनेको मुलुकप्रतिको गद्दारी भएको टिप्पणी गरे ।