सफा हिमाल अभियान सञ्चालन

काठमाडौं । नेपाली सेनाले सञ्चालन गरेको यस वर्षको ‘सफा हिमाल अभियान’ मा ३५ हजार सात सय आठ किलो फोहोर संकलन भएको छ । सगरमाथा, ल्होत्से, अन्नपूर्ण र बरुञ्चे हिमालमा सफाइ अभियान सञ्चालन गरिएको थियो ।

सेनाको अगुवाइमा चैतको अन्तिम सातादेखि सञ्चालन भएको सफाइ अभियान ५५ दिनसम्म चलेको थियो । उक्त अभियानअन्र्तगत सगरमाथा तथा ल्होत्से हिमालबाट १३ हजार छ सय २१ केजी, अन्नपूर्ण हिमालबाट तीन हजार ५६७ केजी र बरुञ्चे हिमालबाट १८ हजार ५२० केजी फोहोर संकलन गरिएको थियो । ३५ हजार केजी फोहोर संकलन गर्ने लक्ष्य लिइएकोमा लक्ष्यभन्दा बढी फोहोर संकलन भएको सेनाले जनाएको छ । संकलित फोहोरहरूमध्ये कुहिने फोहोर स्थानीय तहलाई र नकुहिने फोहोर वेस्ट मेनेजमेन्ट कम्पनी क्रिएसन भेन्चर्सलाई हस्तान्तरण गरिएको थियो ।

चैत्र १४ गतेदेखि सुरु भएको सफा हिमाल अभियान सोमबार एक कार्यक्रमका बीच समापन भएको हो । प्रधानसेनापति प्रभुराम शर्माले सैनिक मुख्यालय जङ्गी अड्डामा आयोजित समापन समारोहमा हिमाल सफाइ अभियानका टोली प्रमुख र सहयोगी शेर्पालाई कदरपत्र प्रदान गरेका थिए । उक्त सफाइ टोलीमा संलग्न फुर्वा शेर्पा र आङ्कामी शेर्पाको भने हिमाल आरोहणपछि फर्कने क्रममा निधन भएको थियो । प्रधानसेनापति शर्माले सो अवसरमा उनीहरूका प्रतिनिधिलाई कदरपत्र प्रदान गर्दै दुवैका सन्ततिलाई १२ कक्षासम्म पढाइका लागि लाग्ने सम्पूर्ण खर्च सेनाले व्यहोर्ने घोषणा गरे ।

वातावरण दिवसका अवसरमा आयोजित उक्त कार्यक्रममा हिमाल आरोहणका क्रममा ज्यान गुमाउनेको आत्माको चिरशान्तिको कामना गर्दै लामा गुरुले शान्ति पाठ गरेका थिए । कार्यक्रममा प्रधानसेनापति शर्माले विकट र प्रतिकूल अवस्थामा पनि फोहर संकलन र आरोहणको साहसिक कार्य पूरा गरेको भनी अभियानमा संलग्न सबैमा धन्यवाद दिए । ‘अभियान प्रकृति र पर्यावरण जोगाउने कार्यसँग जोडिएको छ, प्रकृति संरक्षणको विषय तत्काल लाभ नदेखिए पनि भावी पुस्ताका लागि ठूलो सम्पत्ति हुनेछ, आफूले गरेको फोहर आफैँले व्यवस्थापन गर्ने कार्यलाई कडाइका साथ लागु गर्नुपर्छ’, उनले भने ।

संस्कृति, पर्यटन तथा नागरिक उड्डयन मन्त्रालयका सचिव सुरेश अधिकारीले मानिसको जीवन पद्धतिसँग जोडिएको तथा प्रकृतिको दिगोपन र पर्यावरण जोगाउनुपर्छ भन्ने उद्देश्य रहेको अभियानलाई निरन्तरता दिन आवश्यक रहेको बताए । नेपाली सेना राष्ट्रिय निकुञ्ज तथा वन्यजन्तु आरक्षण निर्देशनालय प्रमुख सुन्दरकुमार पाण्डेले हिमालको स्वच्छता कायम गर्ने उद्देश्यले सञ्चालन भएको अभियानमा सरकारी तथा गैरसरकारी संस्थाबाट महत्वपूर्ण साथ सहयोग प्राप्त भएको बताए । हिमाल सफाइ कार्य जटिल र साहसिक भएको जनाउँदै उनले हिमाललाई वातावनुकूलित तुल्याउने पहिलो सर्त रहेको बताए ।

अभियान सञ्चालनका क्रममा स्थानीय शेर्पाले केही समय भए पनि रोजगारी प्राप्त गरेको तथा अरू आरोहीलाई पनि उत्प्रेरणा प्राप्त भएको सो अवसरमा जानकारी दिइएको थियो । सेनाका अनुसार सफा हिमाल अभियानका क्रममा बिरामी भएका छमध्ये चार जनाको अहिले भारतको मुम्बईमा उपचार भइरहेको छ । अभियानबाट जैविक विविधता र पर्यावरण संरक्षणमा ठूलो योगदान पुग्ने विश्वास लिइएको छ । सेनाले सन् २०१९ बाट सुरु गरेको सफा हिमाल अभियानका क्रममा हालसम्म एक सय नौ टन फोहर संकलन भइसकेको छ ।

सफा र स्वच्छ वातावरणसहितको पृथ्वी भावी पुस्तालाई हस्तान्तरण गर्नु आजको चुनौती भएको त्यसमा संलग्न व्यक्तिहरूले बताए । पर्यटन व्यवसायी लाक्पा सोनाम शेर्पाले जलवायु परिवर्तनबाट उत्पन्न संकटबाट प्रभावित हिमालको ओज र चमक कायम राख्न अभियान कोसेढुङ्गा सावित हुने उल्लेख गरे । उनले भने, ‘हिमाल आरोहणबाट राजस्वमा ठूलो योगदान पु¥याएको छ । हिमालको सुन्दरता कायम राख्न बनेका ऐन, नियम र अनुगमन कडाइका साथ हुनुपर्छ ।’ सो अवसरमा अभियानमा संलग्न विभिन्न क्षेत्रमा महानुभावलाई प्रधानसेनापति प्रशंसा पदक प्रदान गरिएको थियो ।