सेयर ब्रोकरको संख्या ९३ पु-याइने

काठमाडौं । नेपाल धितोपत्र बोर्डका अध्यक्ष रमेशकुमार हमालले धितोपत्र दलाल व्यवसायी (सेयर ब्रोकर कम्पनी)को संख्या ९३ पु-याउने बताएका छन् । बोर्डको ३१औँ वार्षिकोत्सवको अवसरमा आयोजित कार्यक्रममा अध्यक्ष हमालले अबको दुई महिनाभित्र नयाँ र पुराना समेत गरी ब्रोकर कम्पनीको संख्या ९३ पु-याउने बताएका हुन् । पछिल्लो पटक अनुमति पाएका १८ वटा समेत गरी नेपालमा हाल ६८ वटा ब्रोकर कम्पनीहरू रहेका छन् ।

बोर्डले २०७९ असोज २ गते ३० दिनको अवधि तोकेर धितोपत्र दलाल व्यवसायीको लाइसेन्सका लागि आवेदन माग गरेको र सोअनुसार ४५ कम्पनीले आवेदन दिएका थिए । बोर्डले धितोपत्र व्यापारीको लाइसेन्सको लागि न्यूनतम चुक्ता पुँजी एक अर्ब ५० करोड तोकेको छ भने पूर्ण कारोबार गर्ने धितोपत्र दलालको लागि ६० करोड र सीमित कार्य गर्ने धितोपत्र दलाल व्यवसायीको लागि २० करोड रुपैयाँ तोकेको छ ।

चुक्ता पुँजी, ब्रोकर कम्पनीको लागि आवश्यक पूर्वाधार, कागजपत्र पुगेका कम्पनीहरूलाई बोर्डले अनुमति दिँदै जाने नीति लिएको भन्दै हमालले आगामी दुई महिनाभित्र ब्रोकर कम्पनीको संख्या ९३ पु-याउने बताएका हुन् । बोर्डले नयाँ ब्रोकर कम्पनीहरूको लागि आवेदन दिएकामध्येबाट ४३ वटालाई आसयपत्र दिएको थियो । त्यसमध्येबाट पहिलो चरणमा सात र दोस्रो चरणमा ११ वटा गरी कुल १८ वटा कम्पनीलाई ब्रोकर लाइसेन्स दिइसकेको छ । ब्रोकर कम्पनीहरूलाई कारोबार सञ्चालनको लागि अनुमति दिइसकेको छ ।

अध्यक्ष हमालले नयाँ ब्रोकर कम्पनीहरूको आगमनबाट धितोपत्रको दोस्रो बजार कारोबारमा सहयोग पुग्ने विश्वास रहेको बताए । उनले अर्थ मन्त्रालयको सहयोग रहे आगामी आर्थिक वर्षमा वस्तु विनिमय बजारको पनि कारोबार सुरु हुनेगरी तयारी भइरहेको जानकारी दिए ।