प्रदेशमा हस्तान्तरण भएकै सडक डिभिजनबाट केन्द्रीय सडकको काम

काठमाडौँ,साउन २

 यसअघि प्रदेशमा हस्तान्तरण भएका १४ वटा सडक डिभिजनहरुबाटै केन्द्रीय सरकारले चालू आर्थिक वर्ष २०७६÷०७७ को केही समय संघको बजेट खर्च गरेर सडकको पुनर्निर्माण तथा मर्मतको काम गर्ने भएको छ । गत पुस ९ गतेको मन्त्रिपरिषद् बैठकले प्रत्येक प्रदेशमा दुईवटाको दरले १४ वटा सडक डिभिजनलाई सम्बन्धित प्रदेश सरकारलाई हस्तान्तरण गर्ने निर्णय गरेको थियो । अस्ति(मंगलबार) असार मसान्तसम्म ती सडक डिभिजनहरुले केन्द्र र प्रदेश दुवैतर्फको सडकको काम गर्दै आएका थिए । साउन लागेपछि पनि फेरि त्यसैगरी केन्द्र र प्रदेशको सडकको काम ती डिभिजनहरुले गर्ने भौतिक पूर्वाधार तथा यातायात मन्त्रालयले जनाएको छ । 

भौतिक मन्त्रालयहरुले देशभरका सडक कार्यालयहरु कति रहने र ती कार्यालयमा कति कर्मचारी रहने भन्ने ओ एण्ड एम अर्थात् संगठन तथा व्यवस्थापन सर्वेक्षणको काम पूरा गर्नसकेको छैन । प्रदेशमा सडक डिभिजनहरु हस्तान्तरण भएपछि भौतिकले नयाँ संरचना प्रस्ताव गरे पनि संघीय मामिला तथा सामान्य प्रशासन मन्त्रालयले समायोजन सकिएपछि पेस गर्नु भनेर फाइल फर्काइदिएको थियो । केही सडकहरु प्रदेशबाट संघमा फिर्ता आएको, राष्ट्रिय राजमार्गहरु पहिचान गरिएको र नयाँ पुल तथा सडकहरु थप भएको कारण भौतिकले कतिवटा डिभिजनमार्फत काम गर्ने तथा कुन डिभिजनले कुन–कुन जिल्लाका सडकहरुको रेखदेख गर्नेजस्ता कुरा टुंगोमा पु¥याउनसकेको छैन । साथै कुन डिभिजनमा कति दरबन्दी राख्ने र ती दरबन्दी कसरी पूर्ति गर्ने भन्ने पनि एकीन नहुँदै वर्षात्पछि आएको बाढी र पहिरोका कारण देशभरका सडक सञ्जाल ध्वस्त भएका छन् । ध्वस्त सडकलाई आवतजावत सहज बनाउन खर्च गर्ने वैधानिक निकाय चाहिन्छ ।

तत्काल ओएण्डएमको काम नसकिने भएकाले पुरानै डिभिजनहरुबाट केही समयका लागि काम गर्ने वातावरण मिलाउन लागिएको भौतिक मन्त्रालयका सचिव देवेन्द्र कार्कीले बताए । ‘प्रदेशमा डिभिजनहरु हस्तान्तरण भएपछि ओएण्डएम भएको छैन । सडकहरुलाई सुचारु गर्नुपर्ने भएकाले केही समयका लागि प्रदेशमा हस्तान्तरण भएकै डिभिजनहरुबाट काम गर्ने निर्णय गर्न मन्त्रिपरिषद्मा प्रस्ताव गएको छ’, सचिव कार्कीले भने, ‘ओएण्डएमको काम पनि चाँडै सक्ने तयारी छ ।’गत पुसमा प्रदेशमा हस्तान्तरण भए पनि १४ वटा सडक डिभिजनहरुले लामो समयसम्म केन्द्रको मात्रै काम गरेका थिए । केही महिनादेखि प्रशको सडकको काम पनि गर्दै आएका थिए । अब फेरि ती डिभिजनहरुलाई केन्द्रको काम थपिएको छ ।

प्रदेशमा हस्तान्तरण भएको भनिए पनि ती १४ वटै डिभिजन सडक कार्यालयमा केन्द्र सरकारकै इन्जिनियरहरुले काम गरिरहेका छन् । प्रदेशसँग हाइवे इन्जिनियरको अभाव भएको कारण केन्द्र सरकारले तत्कालको लागि हाइवे इन्जिनियरहरु नहटाएको हो । ‘हाइवे इन्जिनियरहरु हटाउनासाथ काम रोकिन्छ’, सडक विभागका एक अधिकारीले भने, ‘नयाँ ओएण्डएम भएर आएपछि मात्र प्रदेशमा हस्तान्तरण भएका डिभिजनबाट केन्द्रका हाइवे इन्जिनियरहरु आआफ्नै कार्यालयमा जान्छन् । अहिलेको काम उनीहरुले नै चलाउँछन् ।’ प्रदेशमा हस्तान्तरण भएर आए पनि १४ वटा डिभिजनहरुमा प्रदेश सरकारले इन्जिनियहरु पठाएको छैन । प्रदेश सरकारले पूर्वाधार विकास कार्यालयबाटै आफ्ना काम गराइरहेको छ । केही जिल्लामा पूर्वाधार विकास कार्यालय र डिभिजन दुवैले प्रदेशको सडकको काम गर्दै आएको कारण प्रदेश सरकारलाई पनि ओएण्डएम गर्न नैतिक दबाब परेको छ ।

गत पुस ९ गतेको मन्त्रिपरिषद् बैठकले प्रदेश नम्बर १ का इलाम र लुम्लिङटार, प्रदेश नम्बर २ का लाहान र चन्द्रनिगाहापुर, प्रदेश नम्बर ३ को खुर्कोट र नुवाकोट, गण्डकी प्रदेशको दमौली र बागलुङ, प्रदेश नम्बर ५ को शिवपुर र प्यूठान, कर्णाली प्रदेशको चौरजहारी र जुम्ला तथा सुदूरपश्चिम प्रदेशको साँझेबगर र बैतडी डिभिजनलाई प्रदेश सरकार मातहत रहने गरी हस्तान्तरण गरेको थियो । ती सबै डिभिजनमा लेखा र प्रशासनका केही कर्मचारी प्रदेशले पठाए पनि सबै कर्मचारी संघकै छन् ।
भौतिक मन्त्रालयले देशभर केन्द्रको सडक हेर्ने गरी २७ वटा सडक डिभिजन राख्ने गरी छलफल चलाए पनि टुंगोमा पु¥याउनसकेको छैन । २७ वटा सडक डिभिजन पनि कहाँ राख्ने भन्ने विषयमा मन्त्रिपरिषद्मै मन्त्रीहरुबीच विवाद रहेको छ । यद्यपि भौतिकले तयार पारेको प्रस्ताव पास हुनेछ । डिभिजनहरुको पुनर्संरचना गर्दा कम विवाद होस् भन्ने उद्देश्यले भौतिकले सूक्ष्म तरिकाले छलफल अगाडि बढाएको हो ।

 

 

 


प्रतिक्रिया पठाउनुहोस्

Massage sent -  awaiting for approval

   
सहकारी–कृषि
कर्पोरेट
अन्तर्वार्ता

पहिलो प्राथमिकता सडक नै हो

जिल्लाको विकट मानिने भोटेकोशी गाउँपालिका वडा नं. १ लिस्तीका अध्यक्ष हुन् मुके शेर्पा । विकासप्रेमी नेताको रुपमा जिल्लामा छवि बनाएका शेर्पाले आफ्नो वडालाई समृद्ध बनाउन विभिन्न उदाहरणीय कामहरु गरेका छन्...

मुके शेर्पा, अध्यक्ष भोटेकोशी गाउँपालिका–१ लिस्ती, सिन्धुपाल्चोक
कार्टून
cartoon

भिडियो
cyberlink adds

हाम्रो बारेमा

आर्थिक दैनिक चाहना पब्लिकेसन प्रा.लि.द्वारा प्रकाशित पूर्ण आर्थिक दैनिक पत्रिका हो ।

सम्पर्क

Chahana Publication (Pvt.) Ltd. , Aarthik National Daily (Aarthik Rastriye Dainik)

Setodewal Marg, Kupondole, Lalitpur

Tel : +977-1-5554236

Fax : +977-1-5523181

Email : aarthik.dainik@gmail.com

Marketing Email : marketing.arthikdainik@gmail.com