सुनको मूर्ति भनी ठगी गर्ने पक्राउ

काठमाडौं, साउन १६
सुनको बुद्धमूर्ति बिक्री गर्ने भनी ठगी गर्ने २ जनालाई उपत्यकाका विभिन्न स्थानहरूबाट महानगरीय अपराध महाशाखाबाट खटिएको प्रहरीले पक्राउ गरेको छ । पक्राउ पर्नेहरूमा महोत्तरी बर्दिबास नगरपालिका ८ बस्ने २१ वर्षीय अनिल बानियाँ र रामेछाप मन्थली नगरपालिका २ घर भई काठमाडौं जोरपाटी बस्ने ३७ वर्षीय बसन्त श्रेष्ठ रहेका छन् ।

आफूहरूसँग आधा किलो सुनसहितको गौतम बुद्धको मूर्ति रहेको र किन्ने भए २० लाख रूपैयाँमा बेच्छौँ भनी नगद १४ लाख रूपैयाँ समेत लिई फरार रहेका उनीहरूलाई नगद एक लाख ९५ हजार रूपैयाँसहित प्रहरीले बुधबार पक्राउ गरेको हो । उनीहरूलाई थप अनुसन्धानको लागि महानगरीय प्रहरी परिसरपठाईएको उक्त महाशाखाले जनाएको छ ।