पुल निर्माण भएको दुई वर्ष नपुग्दै भत्किन थाल्यो

उमेश दुबे
बारा, भदौ ३१
बारा जिल्लाको बरियारपुर अरुवा सडकमा पर्ने तियर खोला पुलको निर्माण भएको २ वर्ष नबित्दै भत्किन थालेको छ । हुलाकी राजमार्ग आयोजना, योजना कार्यालय वीरगञ्जअन्तर्गत निर्माण भइरहेको सडकमा पर्ने तियर खोला पुलमा कमसल समग्री प्रयोग भएको कारण भत्किन थालेको हो ।

चार करोड ४५ लाख ८० हजार एक सय ६९ रूपैयाँको लागतमा निर्माण भएको तियर खोला पुलमा ठेकेदार कम्पनी र सडक विभागको चरम लापरबाही भएको खुल्न आएको छ । तियर पुल निर्माणको लागि पप्पु मोना जेभीले ठेक्का सकार गरे पनि कमसल समग्री प्रयोग गरेको कारण भत्किन थालेको यात्रुहरू बताउँछन् । तियर पुल निर्माण भएको २ वर्ष भए पनि प्रयोगमा आएको मात्र एक वर्ष पूरा भएको छ ।

पप्पु मोना जेभीले निर्माण गरेको तियर पुलको ढलान फुटन थालिएको छ भने आउजाउ गर्ने यात्रीहरू दुर्घटनाको शिकार बन्न पुगेका छन् । तियर पुलको ढलान फुटेपछि फेरिएको रडका कारण दुईवटा दुर्घटना भएको यात्रुहरू बताउँछन् । ढलान फुुटेको र एप्रेच सडकका कारण दुईवटा दुर्घटना भएको हो ।

हुलाकी राजमार्ग आयोजना, योजना कार्यालय वीरगञ्ज र पप्पु मोना जेभीबीच २०६८ असार ३१ गते २०७० असार ३० गते काम सम्पन्न गर्नेगरी सम्झौता भएको थियो । तर ठेकेदार कम्पनीको लापरबाहीले पटक–पटक म्याद थप गरी दुई वर्षअघि मात्रै पुलको निर्माण कार्य सम्पन्न भएको थियो ।