Techie IT
×
गृहपृष्ठबिबिधअंग्रेजी नयाँ वर्षमा कालिञ्चोकमा १० हजार पर्यटक

अंग्रेजी नयाँ वर्षमा कालिञ्चोकमा १० हजार पर्यटक


दोलखा ।
अंग्रेजी नयाँ वर्ष २०२१ को अवसरमा दोलखाको धार्मिक तथा पर्यटकीय स्थल कालिञ्चोकमा करिब १० हजार पर्यटक घुम्न पुगेका छन् । लकडाउनपछि एकैपटक ठूलो संख्यामा उक्त संख्यामा पहिलो पटक मानिसहरु कालिञ्चोक पुगेका हुन् । नयाँ वर्ष मनाउन दोलखा र आसपासका जिल्लाबाट मानिसहरु कालिञ्चोक पुगेका हुन् । शुक्रबार र शनिबार कालिञ्चोकका सबै होटल भरिभराउ देखिएका छन् ।

शुक्रबार करिब सात हजार र शनिबार तीन हजार मानिस कालिञ्चोक आएको कुरी बजारमा होटल व्यवसाय गर्दै आएका होटल सञ्चालक नवराज तामाङले जानकारी दिए । उनका अनुसार दुई दिनको अवधिमा केबलकार चडेर यात्रा गर्ने पर्यटकको संख्या ६ हजार रहेको छ । त्यस्तै चार हजारको हाराहारीमा पैदल हिँडेर मानिसहरुले मन्दिरको दर्शन गरेका छन् । कोरोना भाइरसको कारण १० महिना सुनसान बनेका कालिञ्चोका होटलहरु नयाँ वर्षमा भने भरिभराउ भएको थियो । यहाँ करिब ६० वटा सुविधासम्पन्न होटल नियमित सञ्चालनमा रहेका छन् ।

शुक्रबार पर्यटकको भीडले होटलमा कोठा नपाएर दर्जनौँ पर्यटक चरीकोट बजारमा बास बस्नका लागि झरेका थिए । त्यसैगरी शनिबार पनि मन्दिर आसपासमा पर्यटकको बाक्लो आवतजावत रहेकोे थियो । कोरोनाले वैशाखमा सुनसान देखिएको कालिञ्चोक पुसको अंग्रेजी नयाँ वर्षमा भने भरिभराउ देखिएको हो । लामो समय यात्रुविहीन बनेको केबलकारले समेत राम्रो आम्दानी गर्न सफल भएको छ । दुई दिनको अवधिमा केबलकार प्रालिले छ हजारभन्दा धेरै टिकट बिक्री गरेको कालिञ्चोक केबलकार प्रालिले जनाएको छ ।



तपाईको प्रतिक्रिया