‘अक्सिजन किन्न मेरो एक हजार अभियान’बाट २५ सिलिन्डर अक्सिजन खरिद

दोलखा ।
‘अक्सिजन किन्न मेरो एक हजार अभियान’ सञ्चालन गरेर दोलखाका युवाहरूले २५ वटा अक्सिजन सिलिन्डर खरिद गरेका छन् । उनीहरूले खरिद गरेको सिलिन्डर बुधबार चरीकोट ल्याइएको छ । सो अभियानमा जम्मा भएको रकमले २५ वटा अक्सिजन खरिद गरेर चरीकोट ल्याइएको अभियान्ता गोकर्ण प्रसाद भण्डारीले जानकारी दिए ।

कोरोना भाइरस संक्रमणबाट तल्लो तहका नागरिकले अक्सिजन अभावमा ज्यान घुमाउनु नपरोस् भन्ने उद्देश्यले अभियान सञ्चालन गरेको उनले बताए । अभियानमा स्वदेश तथा विदेशमा रहेका करिब दुई सय युवाहरूले सहभागी भई रकम उपलब्ध गराएका थिए ।

समाजिक सञ्जालमार्फत दुई साता अभियान चलाएको र करिब पाँच लाख रकम जम्मा भएको उनले बताए । अक्सिजन ल्याउन लागेको ढुवानी खर्च तथा भर्ने ज्याला महँगो भएकाले थप केही रकम आवश्यक पर्ने भएको उनले बताए । त्यसैगरी १२ वटा अक्सिजनको रेगुलेटर पनि चरीकोट आइपुगेको छ । युवाहरूले चरीकोट, जिरीलगायतका अस्पतालमा सम्मानढंगले आवश्यक हेरेर अक्सिजन वितरण गर्ने बताएका छन् ।