घरेलु तथा साना उद्योग सोलुमा ७० प्रतिशत कृषि तथा वनजन्य उद्योग दर्ता

सोलुखुम्बु । घरेलु तथा साना उद्योग कार्यालय सोलुखुम्बुमा चालू आर्थिक वर्षको पहिलो त्रैमासमा दर्ता भएका उद्योगमध्ये ७० प्रतिशत कृषि तथा वनजन्य रहेका छन् ।

चालू आर्थिक वर्ष २०७८/७९ को साउनदेखि असोजसम्म जिल्लामा दर्ता भएका एक सय ५९ ओटा नयाँ उद्योगमध्ये एक सय ११ वटा अर्थात् ७० प्रतिशत कृषि तथा वनजन्य रहेको घरेलु तथा साना उद्योग कार्यालय सोलुले जनाएको छ । तीन महिनाको अवधिमा साउन महिनामा ५३ वटा, भदौमा ६६ र असोजमा ४० वटा उद्योग दर्ता भएको कार्यालयका सूचना अधिकारी सुनिता राईले जानकारी दिइन् ।

उनका अनुसार कृषि तथा वनजन्य उद्योग दर्ता गर्ने अधिकांश युवा अवस्थाका रहेका छन् । उनीहरूमध्ये कतिपय वैदेशिक रोजगारबाट फर्किएका व्यक्तिहरू रहेको कार्यालयको तथ्यांक छ । जसबाट चार लाख ८८ हजार आठ सय रुपैयाँ राजस्व समेत संकलन भएको सूचना अधिकारी राईले बताइन् । तीन महिनाको अवधीमा ५९ वटा उद्योग नवीकरण पनि भएको कार्यालयले जनाएको छ ।