मोटरसाइकल चोरी गरी किनबेच गर्ने सात जना पक्राउ

मोरङ । प्रहरीले मोटरसाइकल चोरी गरी किनबेच गर्ने गिरोहलाई पक्राउ गरेको छ । विराटनगर महानगरपालिका–४ स्थित नोबेल अस्पताल अगाडि र वडा नम्बर–५ तोदी भवनलगायत विभिन्न स्थानबाट मोटरसाइकल चोरी गरी किनबेच गर्ने कार्यमा संलग्न रहेको अभियोगमा सात जनालाई प्रहरीले पक्राउ गरेको हो ।

पक्रउ पर्नेहरूमा जहदा गाउँपालिका–१ बुधनगर बस्ने २० वर्षीय हरिओम मण्डल, २० वर्षीय पन्नलाल राजवंशी, १८ वर्षीय किशोर, विराटनगर महानगरपालिका–४ कन्चनबारी बस्ने २२ वर्षीय प्रकाश राजवंशी, कटहरी गाउँपालिका–२ बस्ने २४ वर्षीय मनिष बस्नेत, धनकुटा साँगुरीगढी गाउँपालिका–९ बस्ने ३२ वर्षीय थाम बहादुर राई र ३५ वर्षीय मनकाजी राई रहेका छन् । उनीहरूमध्ये हरिओम, पन्नलाल, प्रकाश, मनिष र किशोर चोरी कार्यमा तथा थाम बहादुर र मनकाजी किनबेच तथा व्यवस्थापन कार्यमा संलग्न रहेको खुल्न आएको प्रहरीले जनाएको छ ।

जिल्ला प्रहरी कार्यालय मोरङबाट खटिएको प्रहरीले उनीहरूबाट प्रदेश १–०२–०४६ प ६४०१, प्रदेश १–०२–०४७ प ३९२४, को.१३ प ८२७५, बीआर ३८ डी ४५०४, प्रदेश १–०२–०४४ प २५७, को.८ प ६७५ र बीआर ३८ जेड ८९७२ नम्बरको मोटरसाइकल बरामद गरेको हो । यस सम्बन्धमा प्रहरीले थप अनुसन्धान गरिरहेको जनाएको छ ।