डाबर वाटिका मिस नेपालका प्रतियोगीद्वारा डाबर नेपाल नर्सरी भ्रमण

काठमाडौं । डाबर वाटिका मिस नेपालको प्रतिष्ठित उपाधिका लागि प्रतिस्पर्धा गर्ने अन्तिम २४ प्रतियोगीहरु सोमबार बनेपास्थित डाबर नेपाल नर्सरीमा पुगेका छन् । यस भ्रमणमा प्रतियोगीहरुले विभिन्न वातावरणीय समसस्याहरु बुझ्न पाए र साथै यस समस्यालाई सम्बोधन गर्न डाबर नेपालको संरक्षण प्रयासबारे बुझ्ने अवसर पाए । डाबर वाटिका मिस नेपालका सहभागीहरुले यहाँको विश्वस्तरीय हरितगृह सुविधाको पनि निरीक्षण गरे । डाबर नेपालले दुर्लभ र लोपोन्मुख जडीबुटीको संरक्षण गर्दै आएका र यी जडिबुटी डाबरका विभिन्न उत्पादनहरुमा पनि प्रयोग गरेका छन् । आइतबार विश्व वातावरण दिवसको अवसरमा प्रतियोगीहरुले डाबर नर्सरीको परिसरमा वृक्षरोपण गरी मनाएका थिए ।

डाबर नेपालका मार्केटिङ प्रमुख अभय गोर्खालीले भने, ‘प्रकृति र प्राकृतिक प्रजातिको संरक्षणका लागि युवाहरुलाई परिचय गराउन पाएकोमा हामीलाई असाध्यै गर्व र खुसी लागेको छ । डाबरले आयुर्वेदमा जरा गाडेको एक शताब्दीभन्दा बढी भैसकेको छ र यसको ज्ञानबाट विश्वभर जडीबुटी, स्वास्थ्य, सौन्दर्यको हेरचाह र आयुर्वेदिक उत्पादनहरुको विस्तृत शृंखलाको उत्पादन र बजारीकरण गरेको छ । आजका युवाहरु भोलिका कर्णधार हुन् । हामीलाई विश्वास छ प्रतियोगीहरुलाई यस प्रकारको एक्सपोजरबाट उनीहरुले वातावरण र समाजमा सकारात्मक रुपमा योगदान गर्न सक्षम हुनेछन् ।’

डाबर नेपालका मेडिसिनल प्लान्टका प्रमुख अरविन्द राणाले दुर्लभ र लोपोन्मुख जडीबुटीको खेती गर्ने प्राविधिक ज्ञान बाँड्दै इको प्रणालीको संरक्षणमा कम्पनीको योगदान रहेकोमा जोड दिए । डाबर नेपालको बनेपामा अत्याधुनिक प्रविधिसहितको विश्वस्तरीय हरितगृह रहेको छ जसले नेपालको ३० वटा जिल्लामा संकटग्रस्त प्रजातिको प्रवर्द्धन र खेती गर्दछ र ६० वटा सहकारीमार्फत जडीबुटी खेती गरी किसानहरुको जीविकोपार्जनलाई वैकल्पिक स्रोतको रुपान्तरण दिएको छ । द हिडन ट्रेजरका अध्यक्ष दिवाकर राजकर्णिकारले प्रतियोगीहरुलाई यो अवसर प्रदान गरेकोमा डाबर नेपाललाई धन्यवाद दिँदै भने, ‘प्रतियोगीहरुले डाबर नेपालले समाजमा पु-याइरहेको संरक्षण र योगदानबारे जान्न यो ठूलो अवसर पाएका छन् ।’

उपभोक्ताहरुलाई उत्कृष्ट प्राकृतिक कपाल हेरचाह समाधानहरु उपलब्ध गराउने डाबरको निरन्तर प्रतिबद्धताको परिणामस्वरुप डाबर नेपालले हालै नेपालमा डाबर वाटिका नेचुरल्स स्याम्पु लन्च गरेको छ । डाबर वाटिका नेचुरल्स स्याम्पु यस वर्षको मिस नेपाल प्रतियोगिताको टाइटल स्पन्सर हो । डाबर वाटिका मिस नेपाल २०२२ को ग्राण्ड फिनाले जुन १८, २०२२ मा गोदावरीस्थित सनराइज अडिटोरियममा हुन गइरहेको छ ।