१९औँ हस्तकला व्यापार मेला २३ गतेदेखि

काठमाडौं । नेपाल हस्तकला महासंघको आयोजनामा १९औँ हस्तकला व्यापार मेला यही मंसिर २३ देखि २७ गतेसम्म हुने भएको छ । महासंघले शुक्रबार पत्रकार सम्मेलन गरी महासंघको आयोजना तथा उद्योग, वाणिज्य तथा आपूर्ति मन्त्रालय, व्यापार तथा निकासी प्रवद्र्धन केन्द्र र उद्योग वाणिज्य क्षेत्रका विभिन्न संघ, संस्थाको सहयोगमा मेला आयोजना हुनलागेको जानकारी दिएको हो ।

महासंघका अध्यक्ष प्रचण्ड शाक्यले ह्यात होटलमा पाँच दिनसम्म हुने मेलामा हस्तकलाका एक सय ५० कक्ष रहने जानकारी दिए । मेलामा फिलगिरी, थोज्यामाज्या (धातु पत्रकला) र पौभा थांका गरी तीनवटा विधाका कला प्रदर्शनी हुनेछ । नेपाली हस्तकलाको प्रवर्द्धन गर्दै विदेशसम्म पहिचान गराउन मेलाको आयोजना गरिएको हो । उक्त मेलासँगै १७औँ हस्तकला प्रतियोगिता समेत हुने भएको छ । काष्ठकला, प्रस्तरकला, मैनकला, मुर्तिकलामा मुखाकृति भएको गरुड अर्थात् बण्टेजको मूर्ति बनाउने र ऊनी, ढाका, कपडा, प्राकृतिक रेशाजन्य वस्तुसम्बन्धी प्रतियोगिता समेत गरिने जनाइएको छ ।