असोज ८ र ९ गते एमालेको प्रथम बागमती प्रदेश अधिवेशन हुने

काठमाडौँ । यही असोज ८ र ९ गते नेकपा (एमाले)को प्रथम बागमती प्रदेश अधिवेशन काठमाडौँमा हुने भएको छ । पार्टीका अध्यक्ष केपी शर्मा ओलीबाट काठमाडौँको भृकुटीमण्डपमा असोज ८ गते उद्घाटन हुने अधिवेशनको बन्दसत्र नेपाल प्रज्ञा प्रतिष्ठानमा हुनेछ ।

अधिकांश पालिका कमिटी र जनसङ्गठनका प्रतिनिधि चयन भइसकेको विवरण प्राप्त भइसकेको र अन्य तयारी पनि पूरा भएको आयोजक कमिटीका अध्यक्ष केशवराज पाण्डेले बताए । एक हजार दुई सय प्रतिनिधि हुने अधिवेशनले दुई सय ४९ सदस्यीय नयाँ नेतृत्व चयन गर्नेछ ।

यसअघि एमालेको लुम्बिनी प्रदेश कमिटीको अधिवेशन भइसकेको छ । अध्यक्ष पाण्डेले नेतृत्व चयनका सर्वसम्मतरूपमा गराउन पहल भइरहेको र सम्भव नभएमा केही पदमा निर्वाचन पनि हुनसक्ने बताएका छन् ।