कोशी प्रदेशका मुख्यमन्त्री कार्कीले लिए शपथ

काठमाडौं । कोशी प्रदेशका मुख्यमन्त्री केदार कार्कीले पद तथा गोपनीयताको शपथ लिएका छन् । आज(आइतबार) दिउँसो प्रदेश प्रमुख परशुराम खापुङले कार्कीलाई एक कार्यक्रमबीच पद तथा गोपनीयताको शपथ गराएका हुन् ।

नेपाली कांग्रेसका कार्की शनिबार कोशी प्रदेशको मुख्यमन्त्री नियुक्त भएका थिए । कार्कीसँगै नेकपा (एमाले)का रामबहादुर राना र नेपाली कांग्रेसका शमशेर राईले मन्त्रीको शपथ लिएका छन् ।

उनीहरूलाई अहिले विनाविभागीय मन्त्री बनाइएको छ । राना नेकपा(एमाले) कोशी संसदीय दलका उपनेता हुन् । कांग्रेसका राईले कार्कीलाई मुख्यमन्त्री बनाउन हस्ताक्षर गरेका थिए ।