कोशीमा मुख्यमन्त्री कार्कीको कात्तिक १ गते विश्वासको मत लिने तयारी

काठमाडौं । कोशी प्रदेशका मुख्यमन्त्री केदार कार्कीले दसैँअघि नै विश्वासको मत लिने तयारी थालेका छन् । प्रदेशसभा सचिवालयले सूचना प्रकाशित गरी कोसी प्रदेशसभाको बैठक आउँदो कात्तिक १ गते बुधबार बिहान ११ बजेका निम्ति बोलाएको छ । श्रोतनुसार विश्वासको मत लिनकै लागि कात्तिक १ मा प्रदेशसभा बैठक बस्ने भएको हो ।

तत्कालीन मुख्यमन्त्री हिक्मत कार्कीले विश्वासको मत लिनुअगावै पदबाट राजीनामा दिएपछि असोज २० गते बैठक स्थगित गरिएको थियो । मुख्यमन्त्री कार्कीले विश्वासको मत लिनुअघि दलका नेताहरूसँग छलफल गर्ने तयारी गरेका छन् । उनले विश्वासको मत लिने प्रस्तावको सूचना आज प्रदेशसभा सचिवलाई दिने बताइएको छ । मुख्यमन्त्री कार्कीले आइतबार पद तथा गोपनीयताको शपथ लिएका थिए ।