कोशीका मुख्यमन्त्री कार्कीले पाए दुई तिहाइबढी मत

मोरङ । कोशी प्रदेशका मुख्यमन्त्री केदार कार्कीले आज(बुधबार) विश्वासको मत पाएका छन् । कांग्रेसबाट विद्रोह समूहर र नेकपा एमालेको समर्थनमा मुख्यमन्त्री नियुक्त भएका उनले प्रदेशसभामा रहेकामध्येबाट दुई तिहाइ भन्दाबढी मत प्राप्त गरेका हुन् ।

९३ सदस्यीय प्रदेशसभामा मुख्यमन्त्री कार्कीको पक्षमा ८६ मत छ भने विपक्षमा ५ जनामात्रै रहे । राप्रपाका एक सांसद अनुपस्थित रहे । संविधानको धारा १६८ (५) अनुसार मुख्यमन्त्री बनेका कार्कीलाई नेकपा (एमाले), नेपाली कांग्रेस, नेकपा (माओवादी केन्द्र) र नेकपा (एकीकृत समाजवादी), जनता समाजवादी पार्टी(जसपा)ले विश्वासको मत दिएका हुन् । जसमा एमालेको उपसभामुखसहित ४०, कांग्रेसको २८, माओवादी केन्द्रको १३, नेकपा एसको ४ र जसपाका एकजना सांसद छन् ।

कार्की गत शनिबार मुख्यमन्त्रीमा नियुक्त भएका थिए । एमालेका ३९ र कांग्रेसका विद्रोही ८ सांसदको समर्थनमा कार्की मुख्यमन्त्री बनेका थिए । केही समय अघि प्रदेश सभामा विश्वासको मत माग्दै मुख्यमन्त्री कार्कीले आफूले मत नपाए कोशी प्रदेशमा स्थिर र गतिशील सरकारको खाँचो हुने भन्दै आफूले राजनीतिक परिस्थितिका कारण मुख्यमन्त्रीको जिम्मेवारी प्राप्त गरेको बताएका थिए ।