अमेरिकी विदेशमन्त्री ब्लिङ्केन र परराष्ट्रमन्त्री साउदबीच भेटवार्ता

वाशिङटन डिसी । अमेरिकी विदेश मन्त्रालयमा परराष्ट्रमन्त्री नारायणप्रकाश साउद र अमेरिकी विदेशमन्त्री एन्टोनी ब्लिङ्केनबीच गए राति द्विपक्षीय भेटवार्ता भएको छ । उक्त भेटमा विकास साझेदारी, व्यापार र बजारको पहुँच, लगानी र प्रविधि, कृषि र खाद्य सुरक्षालगायतका विषयमा महत्त्वपूर्ण छलफल भएको थियोे ।

क्षेत्रीय तथा अन्तर्राष्ट्रिय साझा चासोका विषयमा समेत दुई देशका विदेशमन्त्रीले छलफल गरेका थिए । उक्त अवसरमा नेपालले अल्पविकसित देशबाट मध्यमस्तरको देशमा स्तरोन्नतिका लागि कार्ययोजना बनाएकाले परराष्ट्रमन्त्री साउदले थप सहयोगको खाँचो औँल्याएका थिए ।

नेपाललाई व्यापार तथा लगानी, बजारको पहुँच, कृषिको विकास र सूचना प्रविधिको विकासका लागि सहयोग गर्न अमेरिकी सरकारसँग मन्त्री साउदले अनुरोध गरे ।

नेपालको आर्थिक, सामाजिक विकासका लागि मिलेनियम च्यालेन्ज कर्पोरेशन (एमसिसी) र अमेरिकी सहयोग नियोगको सहयोग उल्लेखनीय भएको मन्त्री साउदले बताए । उनीहरूबीचको द्विपक्षीय वार्ताका क्रममा दुवै पक्षले एमसिसी परियोजना तोकिएको समयमा नै सम्पन्न हुने कुरामा विश्वस्त रहेको बताएका थिए ।

अमेरिकाका लागि नेपालका राजदूत श्रीधर खत्री, मन्त्रालयका अधिकारी र दूतावासका प्रतिनिधिको द्विपक्षीय वार्तामा सहभागिता थियो भने अमेरिकी सरकारका तर्फबाट अमेरिकी उपसहायकमन्त्री डोनाल्ड लु, नेपालका लागि अमेरिकी राजदूत डीनआर थम्पसन सहभागी रहेका थिए ।